काभा महिला भलिबल क्लब च्याम्पियन पुलिस स्वदेश फर्कियो

काभा महिला भलिबल क्लब च्याम्पियन नेपाल पुलिस क्लब स्वदेश फर्किएको छ।

नेपाल पुलिसको महिला भलिबल क्लब ट्रफीसहित त्रिभुवन विमानस्थलमा ओर्लिएपछि टोलीलाई भव्य स्वागत गरिएको छ।

विजेता टोलीलाई प्रहरीका अधिकृतहरूले त्रिभुवन अन्तर्राष्ट्रिय विमानस्थलको परिसरमा भव्य स्वागत गरेका हुन्।

विमानस्थल परिसरमा ब्यान्डबाजा, पुष्पगुच्छा, खादा र मालाले स्वागत गरिएको हो।

साथै, खेलाडीहरूलाई फूल र बेलुनले सजाइएको प्रहरी भ्यानमा राखेर गन्तव्यतर्फ लगिएको छ।

माल्दिभ्सको मालेमा २ दिनअघि शनिवार भएको फाइनलमा पुलिसले उज्वेकिस्तानको हुमो भलिबल क्लबमाथि ३–० को सोझो सेटमा जितसहित उपाधि हात पारेको हो।

लगातार ५ खेलमा अपराजित रहँदै पुलिसले फाइनलमा स्थान बनाएको थियो।

फाइनल खेलमा समेत गरी पुलिसले अविजित ६ खेल खेलेको थियो।

तस्बीरः एजेन्सी