पोखराको विन्ध्यवासिनी मन्दिरमा नवदुर्गा महोत्सवको तयारी

पोखरास्थित विन्ध्यवासिनी मन्दिरमा बडादशैँ नवदुर्गा महोत्सव हुने भएको छ।

घटस्थापनादेखि महानवमीसम्म संचालन हुने महोत्सवको तयारी तीब्र रुपले थालिएको आयोजक विन्ध्यवासिनी धार्मिक क्षेत्र विकास समितिले जनाएको छ।

महोत्सवमा विन्ध्यवासिनी नवदुर्गा शोभायात्रा तथा श्रीमद् देवीभागवत् ज्ञान महायज्ञ हुने आयोजक विन्ध्यवासिनी धार्मिक क्षेत्र विकास समितिले जनाएको छ।

समिति अध्यक्ष गणेशबहादुर श्रेष्ठका अनुसार महायज्ञ संगीतमय झाँकीसहित कथा वाचन गरिनेछ।

मन्दिरमा बेलाबखतमा हुने पर्वविशेष पूजनोत्सव, धार्मिक गतिविधि, आध्यात्मिक प्रवचनलगायतले धर्म र संस्कृतिको संरक्षणमा टेवा मिल्ने उनको विश्वास छ।

समितिका सदस्य सचिव तीर्थ श्रेष्ठका अनुसार घटस्थापनामा नवदुर्गाका नौरुप सिंगारिएका नवकन्या, आरुढ नौरथ, विन्ध्यवासिनी मन्दिरको झाँकी तथा विभिन्न जातिका भेषभूषा र सांस्कृतिक झाँकीसहित शोभायात्रा निकालेर जातीय, धार्मिक, सांस्कृतिक, सामाजिकलगायतका पक्षको उजागर गरिनेछ। घटनास्थापनाको दिन गण्डकीका प्रदेश प्रमुख डिल्लीराज भट्टको प्रमुख आतिथ्यतामा विन्ध्यवासिनीपार्कबाट शोभायात्रा सुरु गरिने कार्यक्रम छ।

शोभायात्रा मोहरियाटोल, भैरवटोल, भीमसेन टोल, नालामुख, तेर्सापट्टी, महेन्द्रपुल, चिप्लेढुंगा, सिद्धार्थचोक, रामकृष्णटोल, गणेशटोलहुँदै पुनः विन्ध्यबासिनी मन्दिर परिसर पुगेर समापन हुनेछ।

त्यही दिनदेखि महायज्ञ सुरु हुने सदस्यसचिव श्रेष्ठले जानकारी दिए।

विजयादशमी अवधिमा मन्दिरमा बिहान ४ बजेदेखि नित्य पूजा हुनेछ।

भक्तजनका लागि ५ बजेदेखि मन्दिर दर्शनको व्यवस्था मिलाइएको छ।

५ देखि ९ बजेसम्म बालगोपाल भजनमण्डल विन्ध्यवासिनी महिला भजन समुहलगायतबाट भजनकीर्तन हुनेछ।
प्रत्येक साँझ ६ बजे आरती गरिनेछ।

बिहान ९ देखि दिउँसो १२ बजेसम्म तथा दिउँसो २ देखि ४ बजेसम्म श्रीमद्भागवत् कथा प्रवचन हुनेछ।

मन्दिरमा संकलित भेटी समितिले मन्दिरको सौन्दर्यकरण, पूर्वाधार निर्माणमा खर्चिंदै आएको जनाएको छ।

२०५१ सालमा स्थापित विन्ध्यवासिनी गुरुकुल विद्यालयमा हाल कक्षा ६ देखि १० सम्म निःशुल्क आवासीयरुपमा अध्यापन कार्य हुने गरेको छ।

यसलाई कक्षा १२ सम्म विस्तार गर्ने समितिको लक्ष्य छ।

यहाँ २०७ सालदेखि विन्ध्यवासिनी ज्येष्ठ नागरिक मिलन केन्द्रसमेत संचालित छ।

जहाँ ज्येष्ठ नागरिकले दिवा सेवा प्राप्त गर्ने गरेका छन्।

हाल, केन्द्रका लागि सुविधायुक्त भवन निर्माण करिब सम्पन्न भएको समितिले जनाएको छ।

समितिले एम्बुलेन्ससमेत संचालन गरेको छ।