यु–१९ महिला टी–२० विश्वकपमा नेपालको लगातार दोस्रो जित

आइसीसी यु–१९ महिला टी–२० विश्वकप एसिया छनोटको खेलमा नेपालले लगातार दोस्रो जित हात पारेको छ।

संयुक्त अरब इमिरेट्स (युएई)को अजमानस्थित द सेभेन रंगशालामा आज (बिहीबार) भएको खेलमा नेपालले कुवेतलाई १०८ रनको फराकिलो अन्तरले हराउँदै दोस्रो जित हासिल गरेको हो।

टस जितेर पहिला ब्याटिङ गरेको नेपालले कुवेतलाई जितका लागि १३१ रनको लक्ष्य प्रस्तुत गरेको थियो।

जवाफी ब्याटिङमा उत्रिएको कुवेत १३ ओभरमा सबै विकेट गुमाएर २२ रनमा समेटियो।

कुवेतका लागि कप्तान जिफा जिलानीले सर्वाधिक १२ रन बनाइन्।

उनले १७ बलमा २ चौका प्रहार गर्दै १२ रन बनाइन्।

कप्तान जिलानीबाहेक अन्य खेलाडीले दोहोरो अंकको रन बनाउन सकेनन्।

आयशा इकबाल पेवेकरले ३ बलमा २ रन बनाएर आउट भइन्।

साराह जसवीले १२ बलमा ४ रन बनाइन्।

जिनिया अफरोज र स्वातिबा कुलदीपसिंह परमारले समान १/१ रन बनाए।

क्यान्डिस डायस, रेलिन मारिया डी सुजा, ईशान्वी मोहनसिंह, पर्ल सेरेना साइमन, खादिजा जाहिर हुसेन र अमिषा राम ओलाचेरी शून्य रनमा आउट भए।

नेपालका लागि रचनाकुमारी चौधरी र सीमा केसीले समान २/२ विकेट लिए।

त्यस्तै, कप्तान पूजा महतो, कृश्मा गुरुङ, मनिषाकुमारी उपाध्यायले समान १/१ विकेट लिए।

यो खेलमा कुवेतले अतिरिक्त २ रन पायो।