कोपा अमेरिकाको क्वाटरफाइनल समीकरण पूरा

कोपा अमेरिकाको समूह ‘सी’ को चिली र उरुग्वे तथा जापान र ईक्वेडरको खेल समाप्तिसँगै क्वटरफाइनल समिकरण पूरा भएको छ ।

क्वाटरफाइनलमा उरुग्वेले पेरुसँग प्रतिस्पर्धा गर्नेछ । चिलीले कोलम्बियासँग खेल्नेछ । यसैगरी, आयोजक ब्राजिलले पाराग्वे र अर्जेन्टिनाले भेनेजुएलासँग क्वाटरफाइनल खेल्नेछ ।

कोपा अमेरिका अन्तर्गत मंगलबार विहान भएको खेलमा डिफेन्डिङ च्याम्पियन चिलीले उरुग्वेसँग हार ब्यहोरेको छ । लिग चरणको अन्तिम खेलमा उरुग्वेले डिफेन्डिङ च्याम्पियन चिलीलाई १ं–० गोलले पराजित गरेको हो ।

उरुग्वेको जितमा एडिन्सन काभानीले निर्णायक गोल गरे । काभानीले ८२ औं मिनेटमा हेड गोल गर्दै उरुग्वेको जित पक्का बनाएका थिए । प्रतिस्पर्धात्मक खेलमा चिलीले पनि गोल गर्ने धेरै राम्रा अवसरहरु गुमायो ।

यस जितसँगै उरुग्वे ‘सी’ समूह विजेता बनेको छ । चार टोली सम्मिलित यस समूहमा दुई जित र एक बराबरी नतिजा निकालेको उरुग्वेको सात अंक छ । हार खेपेपनि चिली समूह उपविजेता बन्दै क्वार्टरफाइनलमा प्रवेश गरेको छ । यसअघिका दुई खेल जितेको चिलीले ६ अंक बनाएको छ ।

यसअघि, समूह ‘सी’ कै अर्को खेलमा जापान र इक्वेडरले १–१ गोलको बराबरी खेल्दै अंक बाँडेका छन् । जापानले सुरुवाती अग्रता लिएपनि बराबरीमा चित्त बुझाएको थियो । जापानका लागि शोया नाकाजिमाले १५ औं मिनेटमा पहिलो गोल गरेका थिए ।

इक्वेडरले ३५ औं मिनेटमा बराबरी गोल फर्काएको थियो । इक्वेडरका लागि एन्जल मेनाले गोल गरेका थिए । समूहमा दुई बराबर र एक हारको नतिजा निकालेको एसियाली टोली जापानले दुई अंक बनायो । दुई हार र एक बराबरी खेलेको इक्वेडरले एक अंक बनाएको छ । यस समूहबाट जापान र इक्वेडर प्रतियोगिताबाट बाहिरिएको छ । कोपा अमेरिकामा जापानले आमन्त्रित टोलीको रुपमा खेलेको हो ।