४ देशीय महिला क्रिकेटः नामिबियासँग नेपाल पराजित

४ देशीय महिला टी–२० अन्तर्राष्ट्रिय क्रिकेट प्रतियोगिताअन्तर्ग नेपाल नामिबियासँग पुनः पराजित भएको छ।

नामिबियासँग नेपाल २३ रनले पराजित भएको हो।

टस जितेर सुरुमा बलिङ गरेको नेपालविरुद्ध नामिबियाले ८ विकेटको क्षतिमा १२५ रन बनाएको थियो।

युगान्डाको एन्टेबे क्रिकेट मैदानमा १२६ रनको लक्ष्य पछ्याएको नेपालले पूरै २० ओभर खेल्दै ५ विकेट गुमाएर १०२ रन मात्र बनाउन सक्यो।

नेपालका लागि साना प्रविनले सर्वाधिक ३१ रन बनाइन्।

त्यसैगरी, पूजा महतो, कप्तान इन्दु बर्मा र कविता जोशीले समान १५/१५ रन जोडे।

त्यसबाहेक नेपालका अन्य कुनैपनि ब्याट्सम्यानले दोहोरो अंकमा रन जोड्न सकेनन्।

नेपाललाई सस्तैमा समेट्न युगान्डाका लागि इभिलुना केजारुकुआले २ विकेट लिइन्।

यसअघि, यास्मिन खानको उत्कृष्ट ब्याटिङसँगै नामिबियाले निर्धारित २० ओभरमा ८ विकेट गुमाउँदै १२५ रनको योगफल बनाएको थियो।

उसका लागि यास्मिन खानले ४४ बल खेल्दै ५ चौकाको सहायताले ४५ रन बनाइन्।

विल्का म्वाटिलले २० रन थपिन्।

अर्रास्टा डियर्गार्डले १६ रन जोडिन्।

त्यस्तै, कप्तान सुने विटम्यानले १५ रन थपिन्।

नेपालका लागि ईश्वरी विष्टले सर्वाधिक ३ विकेट लिइन्।

त्यस्तै, रचनाकुमारी चौधरीले २ विकेट लिइन्।

यसैगरी, रिया शर्मा र इन्दु बर्माले समान १/१  विकेट हात पारे।

योसँगै नेपालले प्रतियोगितामा तेस्रो हारको सामना गरेको छ।

नेपाल आफ्नो पहिलो खेलमा नामिबियासँग ६ विकेटले पराजित भएको थियो।

त्यस्तै, रोमाञ्चक दोस्रो खेलमा भने नेपालले घरेलु टोली युगान्डालाई १ विकेटले पराजित गरेको थियो।

तेस्रो खेलमा नेपाल हङकङसँग २ रनले पराजित भएको थियो।