महिला राष्ट्रिय टोलीलाई खेल जर्सी प्रदान

पोखरा । शनिबार विहान मदन भण्डारी स्पोर्टस् एकेडेमी गण्डकी प्रदेशले नेपालमा हुने १३ औं दक्षिण एसियाली (साग) गेमका लागि बन्द प्रशिक्षणमा रहेका महिला ह्याण्डवलका राष्ट्रिय टोलीलाई जर्सी प्रदान गरेको छ ।

राष्ट्रिय खेलकुद परिषद (राखेप) बोर्ड सदस्य राजेश कुमार गुरूङले जर्सी उपलब्ध गराएका हुन् । खेलाडीलाई पश्चिमाञ्चल क्षेत्रीय खेलकुद बिकास समिति प्रशिक्षण विभाग प्रमुख विद्या मर्सानी, उपनिर्देशक कृष्ण तिमिल्सिना, क्रिकेटका कोषाध्यक्ष जिम्मी गुरुङ (चन्द्र), समाजसेवी बिमलमान गुभाजुलगायतले खेलाडीहरुलाई जर्सी वितरण गरे ।

शुरुमा २८ जना खेलाडीबाट प्रशिक्षण शुरु गरिएकोमा दोस्रो चरणको छनोटमा २१ जना खेलाडीहरु हाल पोखराको बन्द प्रशिक्षणमा छन् ।

दोस्रो चरणको छनोटमा विभागीय आर्मीबाट ११, सशस्त्र प्रहरी बलको एपीएफबाट ६, प्रदेश १ बाट ३ र गण्डकी प्रदेशबाट १ जना छन् ।

विभागीय आर्मीबाट कविता राई, शान्तिकला राई, बिष्णु बोगटी, रामकुमारी चौधरी, देबकुमारी बास्कोटा, बबिता श्रेष्ठ, कल्पना वली, मञ्जु राउत, दुर्गा बोहोरा, अर्चना न्यौपाने शारदा बि.क. छनोटमा परेका छन् ।

एपीएफबाट बन्दना राई, उमा राई, संगीता चौधरी, साधना बम, देवी श्रेष्ठ, आइते ल्हामु शेर्पा छनोटमा परेका छन् । प्रदेश १ बाट रञ्जना राई, निषा राई र जिना राई छनोटमा परेका छन् ।

गण्डकी प्रदेशबाट एक मात्र झिनमाया थापा छनोटमा परेकी छन् । नेपालको महिला राष्ट्रिय ह्याण्डबल प्रशिक्षकहरुमा बिन्दा थापा, भीमसेन शाक्य र कृष्ण शाक्य छन् ।