रुसले ध्वनिभन्दा २० गुणा छिटो उड्ने ‘हाइपरसोनिक अभानगार्ड’ नामक क्षेप्यास्त्र जोड्यो

एजेन्सी । रुसले ध्वनिभन्दा पनि २० गुणा छिटो उड्ने हाइपरसोनिक अभानगार्ड क्षेप्यास्त्रहरू जडान गरेको छ ।

त्यहाँको रक्षा मन्त्रालयले जनाएअनुसार ती क्षेप्यास्त्रहरूमा ‘ग्लाइड’ प्रणाली राखिएकोले प्रहार गर्न सहज हुने र त्यसलाई भेद गर्न असम्भव हुनेछ ।

तर, रूसले ती क्षेप्यास्त्रहरू कहाँ जडान गरेको छ भन्नेबारे भने केही स्रोत खुलाएको छैन । यसअघि नै ति पश्चिमी रुसको युराल पर्वत क्षेत्र वरपर राखिने स्रोत त्यहाँका अधिकारीहरूले दिएका थिए ।

रूसी रक्षामन्त्री सेर्गेई सोइगुले ‘डिसेम्बर २७ मा १० बजे’ ती क्षेप्यास्त्रहरू तैनाथ गरिएको बताउँदै सो घटनालाई महत्वपूर्ण भएको दाबी गरेका छन् ।

यसैगरी राष्ट्रपति भ्लादिमिर पुटिनले परमाणु अस्त्र बोक्न सक्ने ती क्षेप्यास्त्रहरूले रुसलाई अन्य राष्ट्रभन्दा अगाडि पु¥याएको बताएका छन् ।

पुटिनले मंगलवार अभानगार्ड प्रणालीले अहिले भएका सबैखाले क्षेप्यास्त्र प्रतिरक्षा प्रणालीहरूलाई भेदन गर्न सक्ने बताएका थिए । उनले भनेका थिए, ‘अन्य कुनैपनि देशसँग यति छिटो उड्ने हतियार छैनन, क्षेप्यास्त्रको कुरै छाडौँ ।’

पुटिनले अभानगार्डलाई सन् २०१८ को मार्च महिनामा सार्वजनिक गरेका थिए । सन् २०१८ को डिसेम्बरमा सो क्षेप्यास्त्रले परीक्षणमा ६ हजार किलोमिटर परको लक्ष्यलाई प्रहार गरेको थियो ।

अन्तरमहादेशीय क्षेप्यास्त्रको टुप्पोमा राखिएको अभानगार्डले दुई मेगाटनसम्मको परमाणु अस्त्र बोक्न सक्ने बीबीसीले उल्लेख गरेको छ ।

रूसको यो दाबीमाथि तत्काल केही नबोल्ने अमेरिकी रक्षा मन्त्रालयले बताएको छ । हाल हाइपरसोनिक क्षेप्यास्त्र कार्यक्रम अमेरिका र सन् २०१४ मा परीक्षण गरेको चीनको दाबी छ ।

(न्यूज 24 नेपाल डट कममा समाचार प्रकाशित छ)