टेनिसको विश्व वरीयतामा प्रिन्स ११ औं स्थानमा

पोखरा । नेपालका उदीयमान ब्याडमिन्टन खेलाडी प्रिन्स दाहालले विश्व वरीयतामा फड्को मारेका छन् ।

विश्व ब्याडमिन्टन महासंघले सार्वजनिक गरेको विश्व वरीयतामा प्रिन्स ११ औँ स्थानमा उक्लिएका छन् ।

एकसाता अघि प्रिन्स विश्व वरीयताको १४ औँ स्थानमा थिए । विश्व ब्याडमिन्टन महासंघले प्रत्येक साता सिनियरतर्फ तथा यू–१९ जुनियर खेलाडीको वरीयता निर्धारण गर्दै आएको छ । प्रिन्सले प्राप्त गरेको वरीयता हालसम्म ब्याडमिन्टनमा नेपाली खेलाडीले हासिल गरेको उत्कृष्ट नतिजा हो ।

राजधानी काठमाण्डौंमा हालै मात्र सम्पन्न प्रेसिडेण्ट कप इन्टरनेशनल प्रतियोगितामा प्रिन्स यू–१९ को फाइनलमा भारतीय खेलाडी मिराव लुवाङसँग १६–२१, २३–२१ र १५–२१ अंकले पराजित भएका थिए । भारतीय खेलाडी लुवाङ विश्व वरीयताको तेस्रो स्थानमा छन् ।

दुई साताअघि प्रिन्स विश्व वरीयताको ३२ औँ स्थानमा थिए । गत सेप्टेम्बरमा संयुक्त अरब इमिरेट्स (युएई)मा सम्पन्न दुबई इन्टरनेशनल सिरिजको उपाधि जितेपछि प्रिन्सको वरीयतामा उल्लेख्य सुधार भएको हो ।

ब्याडमिन्टनको जुनियरतर्फको वरीयतामा फ्रान्सका क्रिस्टो पोपोभ शीर्ष स्थानमा छन् । चीनका लिउ लियाङ वरीयताको दोस्रो स्थानमा छन् ।