विभागीय आर्मी ए डिभिजन लिगको शीर्ष स्थानमै फर्कियो

काठमाण्डौं । विभागीय त्रिभुवन आर्मी क्लब अर्को जित रच्दै पुनः सहिद स्मारक ए डिभिजन लिगको शीर्षस्थानमा फर्किएको छ ।

अर्को विभागिय टोली नेपाल एपीएफ क्लबलाई बिहीबार २–१ ले हराउँदै आर्मी पुनः शीर्षस्थानमा फर्केको हो ।

बिहीबार नै भएको पहिलो खेलमा रेलिगेसन दबाबमा रहेको सरस्वती युथ क्लबलाई ६–१ ले हराउँदै मच्छिन्द्र केही समयका लागि शीर्षस्थानमा उक्लेको थियो । जारी लिगको अन्तिम २ चरणका खेल बाँकी रहँदा आर्मी र मच्छिन्द्रबीच १ अंकको अन्तर छ ।

जारी लिगको १२ औं चरणको खेलमा पनि दुवै टोलीले जित निकालेमा यी दुई टोलीबीचको अन्तिम खेलले लिग उपाधिको छिनोफाने गर्नेछ । आर्मीको २६ र मच्छिन्द्रको २५ अंक छ । एक खेल कम खेलेको तेस्रो स्थानको मनाङ मस्र्याङ्दी क्लबको १९ अंक छ ।

सातदोबाटोस्थिन एन्फा कम्प्लेक्स पहिलो हाफमा लिएको अग्रतालाई जोगाउँदै आर्मीले जित हासिल गरेको हो । आर्मीको जितमा फेरि एकपटक मिडफिल्डर सन्तोष तामाङ नायक बने । सन्तोषले १७ औं मिनेटमा गोल गर्दै आर्मीलाई अग्रता दिलाएका थिए ।

सन्तोषले पेनाल्टी रिवाउन्डमा गोल गरेका थिए । कप्तान भरत खवासलाई रमेश दंगालले पेनाल्टी बक्समा लडाएपछि आर्मीले पेनाल्टी पाएको थियो । सन्तोषले गरेको पेनाल्टी प्रहारलाई एपीएफका गोलरक्षक राजु योगीले रोकेपनि रिवाउन्डमा गोल गर्न सफल भए ।

खेलको ३७ औं मिनेटमा आशिष लामाको गोलबाट एपीएफले खेलमा बराबरी गरेको थियो । आकाश बुढामगरको कर्नरमा आशिषले हेडमार्फत गोल गर्न सफल भएका थिए । खेलको ‘म्यान अफ दी म्याच’ बन्न सफल सन्तोषले ४२ औं मिनेटमा ब्यक्तिगत दोस्रो गोल गरे । उनले फ्रीकिकमार्फत दर्शनीय गोल गर्दै आर्मीलाई पुनः अग्रता दिलाएका थिए ।

गोलरक्षक राजुले पेनाल्टी बक्सबाहिर ह्यान्ड गरेपछि आर्मीले फ्रीकिक पाएको थियो । जसलाई सन्तोषले सहजै सदुपयोग गरे । त्यही अग्रतालाई जोगाउँदै आर्मीले महत्वपूर्ण जित हासिल गरेको छ ।

मच्छिन्द्र दोस्रो स्थानमै

सहिद स्मारक ‘ए’ डिभिजन लिग फुटबल प्रतियोगितामा लिगको उपाधि होडमा रहेको मच्छिन्द्र फुटबल क्लब शीर्ष दोस्रो स्थानमा कायम छ ।

लिग अन्तर्गत ११ औं चरणको खेलमा मच्छिन्द्रले सरस्वती युथ क्लबलाई पराजित गरेर बिहीबार केही समयका लागि लिगको शीर्ष स्थानमा उक्लेको थियो ।

सातदोबाटोस्थित अखिल नेपाल फुटबल संघ एन्फा कम्प्लेक्समा बिहीबार भएको पहिलो खेलमा सरस्वतीलाई ६–१ गोलअन्तरले पराजित गर्दै लिगको शीर्ष स्थानमा उक्लिन सफल बनेको थियो । बिहीबार नै भएको दोस्रो खेलमा विभागीय आर्मीले अर्को विभागीय सशस्त्रको एपीएफमाथि जित निकालेपछि आर्मी पुनः शीर्ष स्थानमा उक्लिएको थियो ।

मच्छिन्द्रको जितमा मच्छिन्द्रका देवेन्द्र तामाङ, रञ्जित धिमाल, दीपक राई, बिशाल राई (ए), सोमिद ओलुवावुनमी एडिलाजा आन्द्रेसले गोल गरे । दीपक राईले मच्छिन्द्रका लागि दुई गोल गरे । खेलको ‘म्यान अफ दी म्याच’ बन्न सफल दीपकले टोलीका लागि ५४ औं र ७७ औं मिनेटमा गोल गरे ।

मच्छिन्द्रका लागिे देवेन्द्र तामाङले शुरुवाती अग्रता दिलाएका थिए । उनले ४० औं मिनेटमा गोल गर्दै मच्छिन्द्रलाई शुरुवाती अग्रता दिलाए । रञ्जित धिमालको क्रस बलमा देवेन्द्रले हेड गोल गरेका थिए । त्यसपछि, ५४ औं मिनेटमा दीपक रार्ईले ब्यक्तिगत पहिलो गोल गर्दै मच्छिन्द्रलाई दोब्बर अग्रता दिलाए । त्यसको ५ मिनेट बित्न नपाउँदै मच्छिन्द्रका बिशाल राई (ए) ले गोल गर्दै मच्छिन्द्रलाई फरक गोल अन्तरले अग्रता दिलाए । बिशालले ५९ औं मिनेटमा गोल गरेका थिए ।

त्यसपछि खेलको ७७ औँ मिनेटमा दीपक राईले व्यक्तिगत दोस्रो गोल गरे । त्यस्तै खेलको दोस्रो हाफको अत्तिरिक्त समयमा मच्छिन्द्रले २ गोल जोड्यो । मच्छिन्द्रका सोमिद ओलुवावुनमी एडिलाजा र आन्द्रेस नियाले १/१ गोल गरे । त्यस्तै, खेलको ८७ औँ मिनेटमा सरस्वतीका कजिम बुसारीले पेनाल्टीमार्फत एक मात्र शान्त्वना गोल फर्काए । यससँगै ११ खेल खेलेको मच्छिन्द्रले २५ अंक जोड्दै लिगको शीर्ष दोस्रो स्थानमा छ । जारी लिगमा ११ खेल खेलेको सरस्वतीको ४ अंक छ ।