मच्छिन्द्र एफसी लिग च्याम्पियन

पोखरा । मच्छिन्द्र फुटबल क्लब सहिद स्मारक ‘ए’ डिभिजन लिग च्याम्पियन बनेको छ ।

शनिबार दशरथ रंगशालामा भएको फाइनल खेलमा त्रिभुवन आर्मी क्लबलाई १—० गोल अन्तरले पराजित गर्दै मच्छिन्द्र पहिलो पटक लिग च्याम्पियन बनेको हो ।

आर्मीले दिएको आत्मघाती गोलले नै मच्छिन्द्रलाई लिग च्याम्पियन बनायो । बराबरी खेलेपनि लिग च्याम्पियन बन्ने अवस्थामा रहेको आर्मीले ३३ औं मिनेटमा मच्छिन्द्रलाई आत्मघाती गोलको उपहार दिएको थियो ।

आर्मीका विकास तामाङले आत्मघाती गोल गरेका थिए । मच्छिन्द्रका रन्जित धिमालको फ्रीकिक बललाई हेडबाट क्लियर गर्ने क्रममा विकासले आफ्नै पोष्टमा गोल गरेका थिए ।

उनको त्यही गल्तिले आर्मीले लिग जित्ने इतिहास गुमायो । खेलमा आर्मीले बराबरी मात्रै गर्न सकेको भएपनि लिग उपाधि जित्ने अवस्थामा थियो । लिगभरी दुबै टोलीले समान प्रदर्शन गरेको भएपनि गत सिजन अन्तिम–२ मा रहेका कारण मच्छिन्द्रको यो सिजन एक अंकभार घटेको थियो ।

त्रिभुवन आर्मी क्लबका कप्तान तथा फरवार्ड भरत खवास सहिद स्मारक ‘ए’ डिभिजन लिग फुटबलको उत्कृष्ट फरवार्ड बने । यस्तै, च्याम्पियन मछिन्द्रका विशाल राई ‘बी’ उत्कृष्ट मिडफिल्डर बने । थ्रीस्टारका अनन्त तामाङ उत्कृष्ट डिफेन्डर बने । मनाङका दीप कार्की उत्कृष्ट गोलकिपर घोषित भए ।

त्यस्तै, मच्छिन्द्रका प्रवेश कटुवाल उत्कृष्ट प्रशिक्षक बने । उनीहरुले जनही १ लाख ५० हजार पुरस्कार पाए । एनआरटीका दर्शन गुरुङले लिगकै युवा खेलाडी बन्दै मणिविक्रम शाह स्मृति युवा खेलाडीको अवार्ड सहित १ लाख पुरस्कार जिते ।

साविक लिग विजेता मनाङ मस्र्याङ्दी क्लब यस पटकको लिगमा तेस्रो स्थानमा समेटियो । जारी लिगमा २८ अंकका साथ मनाङ तेस्रो स्थानमा रह्यो । जारी लिगको अन्तिम खेलमा जित निकाल्दै मनाङले सुखद अन्त्य गरेको थियो । मनाङले आफ्नो अन्तिम खेलमा जावलाखेल युथ क्लबमाथि १–० को जित निकाल्दै सुखद अन्त्य गरेको थियो ।

त्यस्तै, लिगमा ललितपुरे क्लब थ्रीस्टार २६ अंक सहित लिगको चौथो स्थानमा रह्यो । लिगको अन्तिम खेलमा थ्रीस्टारले च्यासल युथ क्लबमाथि २–० गोलले हराउँदै सुखद अन्त्य गरेको थियो ।