नेपालले प्याराग्लाइडिङको वल्र्ड च्याम्पियनसीपको टिम इभेन्टतर्फको उपाधि जित्यो

पोखरा । नेपालले वल्र्ड कप एसियन टुरको २०२० तथा १९ औं नेपाल खुल्ला प्याराग्लाइडिङ च्याम्पियनसीपको क्रसकन्ट्री विधाको टिम इभेण्टतर्फ उपाधि जितेको छ ।

क्रस कन्ट्रीको टिम इभेन्टतर्फ ४७.८ किलोमिटरको दूरीमा नेपाली टोलीले उत्कृष्ट प्रर्दशन गर्दै उपाधि जितेको हो । अन्य टिमलाई पछि पार्दै १७ अंक सहित नेपालले प्रथम स्थान हासिल गर्न सफल भएको हो । नेपाली टोलीले ३ दिनको खेलमा ५४ अंक जोड्न सफल बन्यो ।

 नेपालले प्रमुख दाबेदार कोरियन टोलीलाई पछि पार्दै उपाधि जित्न सफल भएको हो । पहिलो दिनको खेलमा पछि परेको नेपालले लगातार दुई दिनको खेलमा उत्कृष्ट प्रर्दशन गरेको थियो । टिम नेपालको टोलीबाट प्रतिनिधित्व गरेको नेपाली टिममा युकेश गुरुङ, विशाल थापा, विजय गौतम र शेरबहादुर गुरुङ थिए ।

प्रतियोगिता अन्तर्गत तीन दिनको खेलबाट कोरियाको टिमले ४८ अंक सहित दोस्रो र ४५ अंक ल्याएको जर्मनी तेस्रो बन्यो । लगातार तीन दीन प्रतिकुल मौसमका कारण न्यूनतम एक घण्टा पनि प्रतियोगिहरुले आकासमा उडान गर्न नसकेका कारण खेल स्थगित भएको थियो । नेपाल हवाई खेलकुद संस्था (ना) को आयोजनामा उक्त प्रतियोगिता भएको हो ।

कोरियाले एकलतर्फको प्रतिस्पर्धामा उपाधिका जितेको छ । कोरियाका जङमेन चोइले २ हजार २ सय २० अंकका साथ उपाधि जित्न सफल भए । नेपालका विशाल थापाले २ हजार १ सय ४७ अंकका साथ दोस्रो बने । कोरियाकै चिक्योङ हा ले २ हजार १ सय ३० अंकका साथ तेस्रो बने । नेपालका बिजय गौतम भने चौथो बने ।

त्यसैगरि, अमेरिकाकी ग्यालेन कर्कप्याट्रिकले महिला एकलतर्फको उपाधि जित्न सफल भइन् । उनले तीन दीनको खेलमा १ हजार १ सय ६० अंकका साथ प्रथम बनिन् । कोरियाकी याना ली ७ सय ४७ अंक ल्याउदै दोश्रो भइन भने स्विजरल्याण्डकी सुसन स्टोफरले ३ सय ७१ अंकका साथमा तेश्रो भइन् ।

नेपाल तर्फको १९ औं च्याम्पियनसीप अन्तरगत विशाल थापाले उपाधि जिते । त्यसैगरी, विजय गौतम दोस्रो र आशिष थापा तेस्रो बने । सुरज थापा चौथो र युकेश गुरुङ पाँचौ स्थानमा रहे ।

युवा तथा खेलकुद मन्त्री जगतबहादुर विश्वकर्मा (सुनार), अन्नपूर्ण गाउँपालिकाका अध्यक्ष कर्णबहादुर गुरुङलगायतले विजयी टिम तथा खेलाडीहरुलाई पुरस्कार वितरण गरे । पोखरामा पहिलो पटक भएको यस वल्र्ड कप एशियन टुरमा २० देशका ९४ जना प्यराग्लाइडिङ पाइलटले सहभागिता जनाएका थिए ।