नवलपुरमा कोरोना संक्रमित भेटियो, गण्डकी प्रदेश समेत कोरोना संंक्रमणको जोखिममा

पोखरा । गण्डकी प्रदेशमा समेत कोरोना भाइरस (कोभिड–१९) संक्रमणको जोखिम बढेको छ ।

नवलपुर जिल्लामा बिहीवार १ जनामा कोरोना संक्रमण पुष्टि भएसँगै गण्डकी प्रदेशमा कोरोना भाइरसको जोखिम बढेको हो ।

स्वास्थ्य तथा जनसंख्या मन्त्रालयका अनुसार, बिहीबार नवलपुर जिल्लाको देवचुली नगरपालिका–१२ का ४९ वर्षिय एक पुरुषमा कोरोना संक्रमण पुष्टि भएको छ । चितवनको भरतपुरस्थित प्रयोगशालामा गरिएको परीक्षणमा उनमा कोरोना संक्रमण पुष्टि भएको मन्त्रालयको बिज्ञप्तीमा उल्लेख छ । योसँगै नेपालमा कोरोना संक्रमितको संख्या २ सय ४६ पुगेको छ ।

देवचुली नगरपालिकाका ती पुरुष भारतको कलकत्ताबाट रक्सौल हुँदै मंगलवार राती भरतपुर आइपुगेका थिए । उनलाई बुधवार भरतपुर अस्पतालमा कोरोना जाँच गर्दा पोजेटिभ भेटिएको भरतपुर अस्पतालले जनाएको छ । उनको अहिले भतरपुर कोरोना अस्पतालको आइसोलेसन कक्षमा उपचार भइरहेको छ ।

गत चैतमा कोरोना संक्रमण पुष्टि भएका बागलुङका दुई संक्रमित निको भएर घर फर्किएपछि जोखिम कम भएको महशुस गरिएको गण्डकी प्रदेशमा पुनः बिरामी देखा पर्न थालेको हो ।

कोरोना आशंकामा बागलुङकी एक वृद्ध महिला आइसोलेसनमा

चैतमा दुई कोरोना संक्रमित देखिएको बागलुङमा फेरी अर्का एक महिलामा कोरोनाको आशंकामा आइसोलेसनमा राखिएको छ ।

धौलागिरी अंचल अस्पताल बागलुङका अनुसार, गल्कोट नगरपालिका–६ चरौदीँकी ६५ बर्षिया महिलालाई कोरोनाको शंकास्पद लक्षण देखिएपछि आइसोलेसनमा राखिएको हो । उनको थ्रोट स्वाब संकलन गरि परीक्षणका लागि पोखरा पठाइएको अस्पतालका प्रमुख डा. शैलेन्द्र बी पोखरेलले जानकारी दिएका छन् ।

डा. पोखरेलले उच्च ज्वरो र खोकी रहेका कारण उनलाई आइसोलेसनमा राखेर उपचार थालेको बताए । गलकोटकै स्वास्थ्य संस्थामा सामान्य उपचारपछि बागलुङ आएकी ति महिलामा देखिएका लक्षण कोरोनासँग मिल्दाजुल्दा रहेको अस्पतालले जनाएको छ । मुटुको समेत समस्या रहेकी उनलाई उच्च निगरानीमा राखेर उपचार गरिदैँ आएको छ ।

बिहीबार साँझसम्म उनी लगायत बागलुङबाट पठाइएका १४ जनाको थ्रोट स्वावको नतिजा आउने स्वास्थ्य कार्यालय बागलुङले जनाएको छ । पर्सामा संक्रमित भेटिएका मजदुरहरु बोकेर गएको बसका चालक तथा सह–चालक, सम्पर्कमा आएका व्यक्ति, भारतको नयाँ दिल्लीबाट आएका २ जना लगायत मंगलबार र बुधबार संकलन गरिएका १४ वटै स्वाब बिहीबारमात्रै पोखरा पठाइएको छ ।