पोखराको पाराग्लाइडिङलाई यथावत राख्न उपाय खोज्छौं : मन्त्री श्रेष्ठ

संस्कृति, पर्यटन तथा नागरिक उड्डयनमन्त्री जीवनराम श्रेष्ठले पोखराको पाराग्लाइडिङलाई यथावत राख्न उपाय खोजिने प्रष्ट पारेका छन्।

‘पोखराको ब्राण्डका रुपमा रहेको पाराग्लाइडिङ व्यवसाय अन्तर्राष्ट्रिय विमानस्थल संचालनपछिसमेत कायमै राख्न उपाय खोजिनेछ,’ मन्त्री श्रेष्ठल भने ।

समाजवादी प्रेस संगठनले आज (बुधबार) पोखरामा आयोजना गरेको पत्रकार भेटघाट कार्यक्रममा मन्त्री श्रेष्ठले विमानको सुरक्षामा कुनै असर नपर्ने गरी पाराग्लाइडिङ व्यवसायलाई कायमै राख्न प्रयत्न गरिने जिकिर गरे।

अन्तर्राष्ट्रिय विमानस्थल संचालनमा आएपछि हालको पाराग्लाइडिङ विस्थापित हुनुपर्ने चिन्ताले यहाँका पर्यटन व्यवसायीलाई चिन्तित बनाएको छ ।

मन्त्री श्रेष्ठले भने, ‘पोखराको ब्राण्ड बनिसकेकाले पर्यटन व्यवसायीले पाराग्लाइडिङको संरक्षणको माग गर्नुभएको छ। विमानको सुरक्षामा कुनै सम्झौता गर्नु हुँदैन। सुरक्षामा असर नपर्ने गरी पाराग्लाइडिङ व्यवसाय कुनै उपाय हुँदासम्म कायम गर्नुपर्दछ भनेर लागि परेका छौँ।’

मन्त्री श्रेष्ठले आगामी अंग्रेजी नयाँवर्षदेखि पोखरा अन्तर्राष्ट्रिय विमानस्थल संचालनमा ल्याइने उल्लेख गरे। हालसम्म ९८ प्रतिशत काम सकिएको विमानस्थल सन् २०२३ को जनवरी १ देखि संचालनमा ल्याउने निर्णय केही दिनअघि नेपाल नागरिक उड्डयन प्राधिकरण (क्यान) ले गरेको उनले जानकारी दिए।

मन्त्री श्रेष्ठले विमानस्थल संचालनका लागि समस्याका रुपमा रहेको रिठेपानी डाँडा कटान र ल्याण्डफिल साइट व्यवस्थापनको काम छिट्टै अघि बढाइने बताए। सातै प्रदेशमा एक वर्षभित्रमा नेपाल एकेडेमी अफ टुरिजम एन्ड होटल म्यानेजमेन्ट (नाथुम) को कलेज स्थापना गर्ने सरकारको योजना रहेको उनले बताए। शुरुआतमा गण्डकी, लुम्बिनी र मधेश प्रदेशमा सो कलेज स्थापनाको योजना रहेको मन्त्री श्रेष्ठले उल्लेख गरे।

पर्यटन क्षेत्रमा दक्ष जनशक्तिको माग बढ्दै गएकाले पूर्ति गर्नका लागि नाथुमले सफलता प्राप्त गर्ने र पर्यटन शिक्षा चाहनेहरु काठमाडौँ जानुपर्ने अवस्था अन्त्य हुने विश्वास मन्त्री श्रेष्ठको छ। प्रदेशमा नाथुम कलेज स्थापनाका लागि काठमाडौँ विश्वविद्यालयसँग सम्झौता भइसकेको उनले जानकारी दिए।