एचआइभी संक्रमित गोपाल श्रेष्ठले सगरमाथाको सफल आरोहण गरेर नयाँ विश्व कीर्तिमान राखे

पोखरा । एचआइभी संक्रमित गोपाल श्रेष्ठले सगरमाथाको सफल आरोहण गरेर विश्व कीर्तिमान बनाएका छन् ।

पोखराका ५६ वर्षिय श्रेष्ठ सगरमाथाको चुचुरोमा पुग्ने पहिलो एचआइभी संक्रमित व्यक्ति हुन् । उनी बुधबार बिहान सगरमाथाको चुचुरोमा पुगेका हुन् । उनले एचआइभी संक्रमितले पनि केही गर्न सक्छन् भन्ने सन्देश दिन सगरमाथाको आरोहण गरेका हुन् ।

‘नेभर गिभ अप’ लक्ष्यबाट पछि हट्नु हुँदैन भन्ने लक्षसहित गोपाल श्रेष्ठ विश्वभरी रहेका एचआइभी संक्रमितहरुको प्रतिनिधित्व गर्दै सर्वोच्च शिखर सगरमाथामा पाइला राख्ने अभियानमा होमिएका हुन् ।

उनले सगरमाथाको चुचुरोमा सफलतापूर्वक आरोहण गरेको सम्पर्क अधिकृत ज्ञानेन्द्र श्रेष्ठले जानकारी दिएका छन् ।

काठमाडौं–लुक्ला–नाम्चे–पाङबोचे–बेसक्याम्प हुँदै गोपाल श्रेष्ठसहित ६ जनाको टोली बुधबार बिहान सगरमाथा पुगेका थिए । उनले ड्रिमर्श डेस्टिनेशन ट्रेक्स एण्ड एक्सपिडिशन प्रालिका फुर्वा तेन्जिङ शेर्पाको नेतृत्व र दाकिपा शेर्पाको सहजीकरणमा सगरमाथा आरोहण गरेका हुन् ।

पुर्व राष्ट्रिय फुटवल खेलाडीसमेत रहेका श्रेष्ठलाई २५ बर्ष अघि एचआइभी संक्रमण देखिएको थियो । सन् २०१५ मा पनि सगरमाथा आरोहणका लागि गएका श्रेष्ठ भुकम्पका कारण आधार शिविरबाटै फर्किएका थिए । त्यतिबेला, उनीसँगै गएको आफ्ना सहयात्री ५ जनालाई भने गुमाउनु परेको थियो।

स्टेप अप क्याम्पेन सेकेण्ड फेज अभियान अन्तर्गत सगरमाथा आरोहण गर्न सफल श्रेष्ठले यसअघि सन् २०१३ अक्टोबरमा मनाङ र मुस्ताङको बीचमा पर्ने थोराङ् ला पास (५४१६ मि.), २०१४ मा सोलुखुम्बुको आइस ल्याण्ड पिक (६१८९), र २०१६ मा दोलखाको भर्जिन पिक खाङ कार्पो (६६४६ मि.) को आरोहण गरिसकेका छन् ।