फिफा अध्यक्ष जियानी ईनफान्टिनोको टाउकोमा नेपाली ढाका टोपी

पोखरा । फ्रान्सको पेरिसमा जारी फिफा कंग्रेस बैठकमा फिफा अध्यक्ष जियानी इन्फान्टिनो नेपाली ढाका टोपीमा सजिएका छन् ।

बैठकका लागि नेपाली टोलीको नेतृत्व गरेका अखिल नेपाल फुटबल संघ, एन्फाका अध्यक्ष कर्माछिरिङ शेर्पाले फिफा अध्यक्ष इन्फान्टिनोलाई नेपाली ढाका टोपी लगाइदिएका हुन् ।

इन्फान्टिनो पुनः फिफा अध्यक्ष

फिफा अध्यक्षमा उनै जियानी इन्फान्टिनो पुनः निर्वाचित भएका छन् ।

विश्व फुटबलको सर्वोच्च निकाय फिफामा इन्फान्टिनो दोस्रो कार्यकालका लागि निर्वाचित भएका हुन् । ४९ बर्षीय स्विस–ईटालियन इन्फान्टिनोले सन् २०२३ सम्म फिफाको नेतृत्व गर्नेछन् । फ्रान्सको पेरिसमा बसेको फिफाको बार्षिक साधारणसभाले उनलाई सर्वसम्मत रुपमा दोस्रो कार्यकालका लागि पुनः निर्वाचित गरेको हो ।

सेप ब्लाटरपछि फिफा नेतृत्वमा आएका उनीले सन् २०२६ को विश्वकपमा टिम संख्या परिवर्तन र क्लब विश्वकपको ढाँचामा व्यापक फेरबदल गरेका छन् । सन् २०१५ मा भएको भ्रष्टाचारको काण्डमा तत्कालीन अध्यक्ष ब्लाटर १७ बर्षको निलम्बनमा परेपछि फिफा नेतृत्वमा इन्फान्टिनो आएका थिए ।

इन्फान्टिनोको निर्वाचन अगाडि फिफाले एक नियम परिवर्तन गरेको थियो । निर्वाचनमा एक मात्र उम्मेवारी रहेको खण्डमा फिफाका २ सय ११ राष्ट्रले भोट गर्न नपर्ने नियम बनाएको थियो ।

युइएफएका पुर्व महासचिवसमेत रहेको इन्फान्टिनोले सन् २०२६ को विश्वकपबाट सहभागी देशको संख्या बढाएर ३२ टिमबाट ४८ पु¥याएका छन् । सो प्रतियोगिता अमेरिका, क्यानडा र मेक्सिकोले संयुक्त रुपमा आयोजना गर्दैछन् ।

यस्तै, फिफाले सन् २०२१ बाट क्लब विश्वकपमा २४ टिम खेलाउने निर्णयलाई अनुमोदन गरेको छ । यद्यपी, युरोपको ठूला क्लबले प्रतियोगिता बहिष्कार गर्ने जनाएका छन् ।