पोखरामा नेवारी संस्कृतिको ताया मचा प्रतियोगिता

पोखरामा नेवारी संस्कृतिको महिला तथा पुरुष ताया मचा प्रतियोगिता सकिएको छ।

गाईजात्राको अवसर पारी नेवाः खलः कास्कीको आह्वानमा भएको ताया मचा नृत्य प्रतियोगितामा पुरुषतर्फ बागबजार बगर ताया मचा समिति र महिलातर्फ लामाचौर नेवाः खल प्रथम भएका छन् ।

नयाँबजार सांस्कृतिक समितिको आयोजनामा शनिबार भएको प्रतियोगितामा पुरुषतर्फ १९ र महिलातर्फ ९ गरी २८ समूहको प्रतिस्पर्धा थियो।

समिति अध्यक्ष योगेन्द्रमान बाटाजुका अनुसार पुरुषतर्फ रानीपौवा ताया मचा नाच समिति दोस्रो, गोपालजी मन्दिर सेवा समिति, रामकृष्ण टोल तेस्रो र गैह्रापाटन नेवाः समाज सान्त्वना भए।

त्यस्तै, महिलातर्फ समाज कल्याण नेवाः खल, राजाको चौतारो दोस्रो र रुपा देउराली नेवाः खल, रुपा गाउँपालिका तेस्रो भए।

पुरुषतर्फ विजेताले ३ लाख, द्वितीयले २ लाख, तृतीयले १ लाख र सान्त्वना हुनेले ३० हजार रुपैयाँ प्राप्त गरे।

महिलातर्फ प्रथम हुनेले ४० हजार, द्वितीय हुनेले ३० हजार र तृतीय हुनेले २० हजारसहित प्रमाणपत्र प्राप्त गरेका छन्।

पुरस्कारका लागि स्व. हेमप्रसाद र बालकुमारी श्रेष्ठको स्मृतिमा उनका छोराहरु पोखरा–३ निवासी रामकाजी, रवीन्द्र, शंकर र कविन्द्र श्रेष्ठ परिवारले प्रायोजन गरेका थिए।