साफ महिला फुटबलको खेल तालिका सार्वजनिक

दक्षिण एशियाली फुटबल महासंघ (साफ) महिला फुटबल च्याम्पियनसीप फुटबलमा नेपालले पहिलो खेल भुटानसँग खेल्ने भएको छ।

काठमाण्डौको दशरथ रंगशालामा आउँदो कात्तिक १ गतेदेखि कार्तिक १४ गतेसम्म आयोजना हुने साफ महिला च्याम्पियनसीपको सार्वजनिक भएको खेल तालिकाअनुसार घरेलु टोली नेपालले पहिलो खेलमा भुटानसँग प्रतिस्पर्धा गर्नेछ।

साफले निकालेको तालिकाअनुसार समूह ‘बी’ मा रहेको नेपालले कार्तिक २ गते भुटानसँग खेल्नेछ।

नेपालले कार्तिक ५ गते माल्दिभ्स र कार्तिक ८ गते श्रीलंकासँग खेल्नेछ।

‘बी’ मा नेपाल, भुटान‚ माल्दिभ्स र श्रीलंका छन्।

तालिकाअनुसार प्रतियोगिताको उद्घाटन खेलमा भने भारत र पाकिस्तानबीच प्रतिस्पर्धा हुनेछ।

समूह ‘ए’ मा साबिक विजेता बंगलादेशसँगै भारत र पाकिस्तान छन्।

दुवै समूहका शीर्षमा रहने २ टोली सेमिफाइनल पुग्नेछन्।

नेपालले महिला साफ आयोजना गर्न लागेको यो लगातार तेस्रो पटक हो।

महिला साफ च्याम्पियनसीपका पछिल्ला २ संस्करण सन् २०१९ र सन् २०२२ मा पनि नेपालमै भएको थियो।