रूसी संचारमाध्यममाथि विश्वव्यापी प्रतिबन्ध

विदेशी हस्तक्षेप गतिविधि बढाएको भन्दै रूसी सामाजिक सञ्जालबाट रूसी सरकार समर्थित संचारमाध्यममाथि विश्वव्यापी रुपमा प्रतिबन्ध लगाएको समाचार छ।

समाचारअनुसार, टेक जायन्ट कम्पनी मेटाले सोमबार विदेशी हस्तक्षेप गतिविधि बढाएको कारण आफ्नो फेसबुक, इन्स्टाग्राम, ह्वाट्सएप, थ्रेड्सलगायतका सामाजिक सञ्जालबाट रूसी सरकार समर्थित संचारमाध्यमलाई विश्वव्यापी रुपमा प्रतिबन्ध लगाएको हो।

संयुक्त राज्य अमेरिकाले रुस समर्थित समाचारमाध्यम आरटीको कर्मचारी र यसका प्रधानसम्पादकलाई अमेरिकी चुनावलाई प्रभाव पार्ने आरोपमा प्रतिबन्ध लगाएको केही समयपछि मेटाले यो घोषणा गरेको हो।

युएस स्टेट डिपार्टमेन्टले आरटीलाई युरोप, अफ्रिका, उत्तर र दक्षिण अमेरिकाका देशहरूमा ‘सूचना संचालन, गुप्त प्रभाव र सैन्य खरिद’ मा संलग्न भएको आरोप लगाएको छ।

‘सावधानीपूर्वक विचार गरेपछि, हामीले रूसको राष्ट्रिय संचारमाध्यमविरुद्ध हाम्रो चलिरहेको प्रवर्तन विस्तार गरेका हौँ’, मेटाले बताएको छ।

‘रोसिया सेगोडन्या, आरटी र अन्य सम्बन्धित संस्थाहरूलाई अब विदेशी हस्तक्षेप गतिविधिको लागि विश्वव्यापी रूपमा हाम्रा सञ्जालहरुबाट प्रतिबन्ध लगाइएको छ’, मेटाले भन्यो।

सन् २०२२ को फेब्रुअरीमा रुसले युक्रेनमा आक्रमण गरेपछि आरटीलाई गैरकानुनी रुपमा संचालित रहेको आरोपमा बेलायत, क्यानाडा, युरोपेलीसँग र संयुक्त राज्य अमेरिकामा औपचारिक रुपमा प्रतिबन्ध लगाइएको थियो।

आरटीमाथि अमेरिकाविरुद्ध भ्रामक सूचना फैलाउने गोप्य परियोजनाको रुपमा अनलाइन सामग्री निर्माण कम्पनी ‘टेनेसी’लाई वित्तपोषण गरेको अभियोग लगाइएको छ।

सन् २०२३ को अन्त्यमा सुरु भएदेखि रुसले समर्थन गरेको अमेरिकी अनलाइन सामग्री निर्माण कम्पनीले अमेरिकाविरुद्ध लगभग २ हजार भिडियो पोस्ट गरेको छ।

भिडियोहरू युट्युबमा मात्रै १ करोड ६० लाखभन्दा बढी पटक हेरिएको अभियोगमा उल्लेख गरिएको छ।

यसअघि, मेटाले रूसी इन्टरनेट अनुसन्धान विभागको विदेशी हस्तक्षेप गतिविधिलाई विफल पार्न रसियाको संघीय समाचार समितिलाई प्रतिबन्ध लगाएको थियो।

एजेन्सी