टी–२० क्रिकेटमा नेपालले अमेरिकालाई हरायो

पहिलो टी–२० खेलमा घरेलु टोली अमेरिकालाई नेपालले १७ रनले हराएको छ।

नेपालले दिएको १६५ रनको लक्ष्य पछ्याएको अमेरिकाले निर्धारित २० ओभरमा ७ विकेट गुमाएर १४७ रन मात्र बनाउन सक्यो।

अमेरिकाका लागि शायन जहाँगीरले अविजित ६० रन बनाएपनि टिमलाई जित दिलाउन असफल रहे।

यस्तै, आन्द्रेस गौसले ३० रन बनाए।

नेपालका दीपेन्द्रसिंह ऐरीले ३ विकेट लिए।

यस्तै, रिजन ढकाल, करन केसी र गुल्सन झाले समान १/१ विकेट लिए।

त्यसअघि डल्लासमा टस हारेर पहिले ब्याटिङ गरेको नेपालले निर्धारित २० ओभरमा ९ विकेट गुमाएर १६४ रन बनायो।

नेपालका लागि कप्तान रोहित पौडेले सर्वाधिक ४९ रन बनाए।

यस्तै, दीपन्द्रसिंह ऐरीले २८ बनाए।

त्यसैगरी, अनिल साह र आशिफ शेखले समान २७ रन बनाए।

अमेरिकाका हर्मित सिंह, सौरभ नेत्रावलकर र जसदीप सिंहले समान २/२ विकेट लिए।

आजको जितसँगै नेपालले ३ खेलको टी–२० श्रृंखलामा १–० को अग्रता बनाएको छ।

अब, नेपाल र अमेरिकाबीचको दोस्रो टी–२० खेल आउँदो आइतवार र तेस्रो तथा अन्तिम खेल सोमवार हुनेछ।

यो टी–२० श्रृंखलापछि अमेरिकामै विश्वकप लिग–२ अन्तर्गत नेपाल, अमेरिका र स्कटल्यान्डबीचको त्रिदेशीय एकदिवसीय श्रृंखला हुनेछ।

नेपालले अमेरिकासँग टी–२० अन्तर्राष्ट्रिय खेल पहिलो पटक खेल्न लागेको हो।

यसअघि, नेपाल र अमेरिकाबीच ७ वटा एकदिवसीय खेल भएकोमा ४ खेलमा नेपाल विजयी हुँदा २ खेलमा हार र १ खेल नतिजाविहीन थियो।