टी–२० क्रिकेटमा अमेरिकामाथि नेपालको ‘क्लिन स्वीप’

अन्तिम खेलमा अमेरिकाले दिएको १५७ रनको लक्ष्य नेपालले १८ ओभर ४ बलमा २ विकेट गुमाएर भेटायो। अमेरिकासँगको पहिलो खेलमा नेपाल १७ रन र दोस्रो खेलमा ‘सुपर ओभर’मा विजयी बनेको थियो।

टी–२० क्रिकेट श्रृंखलामा अमेरिकामाथि ३ खेलको जित निकाल्दै नेपालले ‘क्लिन स्वीप’ गरेको छ।

टी–२० श्रृंखलाअन्तर्गत अमेरिकाको डालासमा हिँजो (सोमबार) भएको तेस्रो तथा अन्तिम खेलमा नेपालले अमेरिकालाई ८ विकेटले हराउँदै शृंखलामा ‘क्लिन स्वीप’ गरेको हो।

अमेरिकाले दिएको १५७ रनको लक्ष्य नेपालले १८ ओभर ४ बलमा २ विकेट गुमाएर भेटायो।

नेपालका आसिफ शेखले अर्धशतक बनाए।

आसिफ ३९ बलमा ५० रन बनाएर आउट भए।

यस्तै, कुशल मल्लले ४४ रन बनाए।

कुशल भुर्तेल ४० रनमा नटआउट रहे।

अमेरिकाका जसदीप सिंह र जुआनोए ड्रेस्डेलले १/१ विकेट लिए।

यसअघि, टस जितेर ब्याटिङ गरेको घरेलु टोली अमेरिकाले २० ओभरमा ५ विकेट गुमाएर १५६ रन बनायो।

अमेरिकाका साइतेजा मुकामलाले ६८ रन बनाए।

मिलिन्द कुमारले नटआउट ४३ रन जोडे।

नेपालका सोमपाल कामीले ३ विकेट लिए।

रिजन ढकाल र ललित राजवंशीले समान १/१ विकेट लिए।

अमेरिकासँगको पहिलो खेलमा नेपाल १७ रनले विजयी भएको थियो।