असन्तुष्टहरुका कारण पार्टी फुट्दैनः माधव नेपाल

नेकपा एकीकृत समाजवादीका अध्यक्ष माधवकुमार नेपालले पार्टीका असन्तुष्टहरुहरुका कारण पार्टी नफुट्ने दाबी गरेका छन्।

पुर्व प्रधानमन्त्रीसमेत रहेका नेपालले पार्टीका असन्तुष्टहरुसँग कुरा मिलिसकेको उल्लेख गरेका छन्।

उनीहरुले पार्टीपनि नफुटाउने र अन्य दलमापनि नजाने नेपालको दाबी छ।

समाजवादी प्रेस संगठन कास्कीले सोमबार पोखरामा आयोजना गरेको पत्रकार भेटघाट कार्यक्रममा बोल्दै उनले अध्यक्ष नेपालले सरकार र प्रधानमन्त्री केपी शर्मा ओलीलाई आफ्नो पार्टी फुटाउनुतिर लाग्नु भन्दा बरु विकास र समृद्धिमा लाग्न सुझाव दिए।

‘हाम्रो पार्टीलाई सिध्याउन खोज्नेहरुको धन्दै बेग्लै, यो पार्टीलाई कसैले सिध्याउँछु, धरासायी पार्छु, कमजोर पार्छु, भन्ने सोंचेको छ भने मनको कुण्ठाबाहेक अरु केहीपनि हुँदैन’, उनले भने।

अध्यक्ष नेपालले नेकपा एमाले र माओवादी दुवै पार्टीसँग तत्काल एकता संभव नभएको स्पष्ट पारे।

एमालेसँग एकताको कल्पनासमेत नगरेको उनले जोड दिए।

उनले भने, ‘एमालेसँग एकता नगर्ने भनेर कसम त खाएको छैन। कमजोरी, अहमता नसच्चिएसम्म त्यो सम्भवपनि छैन। एमाले अध्यक्ष ओली सच्चिनुपर्छ।’

माओवादीसँग एकताको परिस्थिति बनिनसकेको उल्लेख गरे।

‘माओवादीसँग पनि तत्काल एकताको संभावना छैन’, उनले जोड दिए, ‘बरु समाजवादी मोर्चा बनाएर जान सकिन्छ।’

उनले हाल तत्काललाई सरकार परिवर्तन नहुने स्पष्ट पारे।

‘काँग्रेस एमाले मिलेसम्म अन्य दलले टाउको फुटाएपनि केहि हुनेवाला छैन’, उनको भनाई छ, ‘त्यसैले तत्काल सरकार परिवर्तन हुँदैन।’

अध्यक्ष नेपालले ओली सरकारको सय दिनमा जनताले महशुस गर्नेगरी केहिपनि काम नभएको दाबी गरे।