नेपालले जित्यो हङकङसँगको एकदिवसीय क्रिकेट श्रृंखला

नेपालको यु–१९ टोलीले हङकङसँगको एक दिवसीय श्रृंखला एक खेलअगावै जितेको छ।

हङकङको १९ वर्षमुनिको टोलीसँगको ३ खेलको एकदिवसीय क्रिकेट श्रृंखला नेपाली युवा टोलीले जितेको छ।

मूलपानी क्रिकेट मैदानमा आज (बुधबार) भएको दोस्रो खेलमा हङकङलाई २२६ रनले हराउँदै नेपालले एक खेलअघि नै श्रृंखला जितेको हो।

नेपालले दिएको २९८ रनको लक्ष्य पछ्याएको हङकङ २९ ओभर ४ बलमा ७१ रनमै अलआउट भयो।

हङकङका कप्तान शिभ माथुरले सर्बाधिक १६ रन बनाए।

हङकङका ७ जना खेलाडीले दोहोरो अंकमा रन बनाउन सकेनन्।

नेपालका दयानन्द मण्डलले ४ विकेट लिए।

यसअघि, टस जितेर ब्याटिङ गरेको नेपालले ५० ओभरमा ९ विकेट गुमाएर २९७ रन बनायो।

नेपालका सोहेल कुँवरले सर्बाधिक ८१ रन बनाए।

त्यसपछि, सन्तोष यादवले नटआउट ६६ रन जोडे।

हङकङका डेनेल मापले ३ विकेट लिए।

हङकङसँगको पहिलो खेल नेपालले ३ विकेटले जितेको थियो।

नेपाल र हङकङको १९ वर्षमुनिको तेस्रो तथा अन्तिम खेल पर्सि (शुक्रवार) हुनेछ।

१९ वर्षमुनिको विश्वकप एशिया छनोटको तयारीका लागि नेपाल र हङकङबीच यो श्रृंखला भइरहेको हो।

विश्वकप एशिया छनोट आउँदो वर्षको अप्रिलमा काठमाण्डौमा हुनेछ।