प्रेस काउन्सिलविरुद्धको रिटमा अन्तिम सुनुवाइ हुने

उच्च अदालत पाटनमा प्रकाशन गृह ‘दियो मिडिया प्राइभेट लिमिटेड’ले प्रेस काउन्सिल नेपालविरुद्ध दायर गरेको रिट निवेदनमाथि अन्तिम सुनुवाई हुने भएको छ।

न्यायाधीशहरु खडानन्द तिवारी र कृष्णराम कोइरालाको संयुक्त इजलासले उक्त रिटमा अन्तिम सुनुवाइ गर्ने आदेश गरेको हो।

‘मिति २०८१/९/१९ को यस अदालतबाट भएको आदेशअनुसारको कार्य सम्पन्न नभएकाले उक्त आदेशमा उल्लिखित कागजहरूको प्रतिलिपि मगाई मिसिल सामेल राख्नू’ आदेशमा भनिएको छ, ‘प्रस्तुत निवेदनमा प्रत्यर्थीका तर्फबाट लिखित जवाफसमेत प्राप्त भइसकेको देखिँदा पूर्ण सुनुवाइका लागि नियमानुसार पेस गर्नू।’

अदालतले यही पुस १९ गते सर्वोच्च अदालतमा यसअघि चलेको उत्प्रेषणको रिट निवेदन, लिखित जवाफ एवं सो रिटमा सर्वोच्च अदालतबाट जारी भएको अन्तरिम आदेशको प्रतिलिपि र अन्तरिम आदेशसम्बन्धी छलफलका लागि पेस गर्न आदेश गरेको थियो।

काउन्सिलले उक्त प्रकाशन गृहलाई गलत र भ्रामक सूचना सम्प्रेषण गरेको, नियामक निकायलाई अटेर गरेको उल्लेख गर्दै सो प्रकाशन गृहलाई कालोसूचीमा राख्ने निर्णय गरेको थियो।

उक्त निर्णयविरुद्ध उक्त प्रकाशन गृहले उच्च अदालतमा रिट दायर गरेको थियो।