लेखनाथ महोत्सव, दैनिक उपभोग्य सामग्री खरिद–विक्रिको थलो बन्यो

२० औं संस्करणको लेखनाथ महोत्सवस्थल खरिद–विक्रिको केन्द्रबिन्दु जस्तै बनेको छ।

कास्कीको लेखनाथस्थित तालचोकमा पुसको १८ गतेदेखि सुरु महोत्सवमा आएर रमाइलो पनि हेर्न पाइने र घर फर्कदा आफूलाई आवश्यक पर्ने स्वदेशीदेखि विदेशी सामानहरु सुपथ मुल्यमा खरिद गर्न पाइने भएपछि महोत्सवस्थल ब्यापारिक केन्द बिन्दु जस्तै बनेको हो ।

महोत्सवमा आएका दर्शकहरुले घर फर्कदा केही न केही सामाग्री लिएर घर फर्कने गरेकाले अघिल्ला दिनको तुलनामा ब्यापारको कारोवार बढेको आयोजक सस्था लेखनाथ उद्योग बाणिज्य संघका कोषाध्यक्ष ध्रुववावु भट्टराईको दावी छ।

महोत्सवस्थलमा राखिएका करिव ३३६ फरक/फरक प्रकृतिका स्टलहरुमा दैनिक उपभोग्य सामानहरु पाइने भएपछि उपस्थित दर्शकहरु खुसी हुँदै फर्किन्छन् भने ब्यापारी पनि अघिल्ला दिनको तुलनामा ब्यापार बढेकोमा सन्तुष्ट देखिन्छन्।

माघ १ गतेसम्म चल्ने महोत्सव आठौं दिनमा चलिरहँदा आज (विहीवार) मात्र ४० लाख वरावरको आर्थिक कारोवार भएको आयोजनक संस्था लेखनाथ उद्योग वाणिज्य संघको दाबी छ।

महोत्सव प्रचार–प्रसार उपसमितिकी संयोजक जानुका अधिकारीका अनुसार महोत्स सुरु भएदेखि हालसम्म ३ करोड ७५ लाख बरावरको आर्थिक कारोवार भएको स्टलमा गरिएको ब्यापारको सर्वेक्षणले देखाएको छ।

वातावरणीय अनुकुलले साथ दिएकाले मध्यान्हपछि दर्शकको चाप वाक्लो देखिन्थ्यो।

महोत्सव हेर्न आउने दर्शकहरुको चाप दिन, प्रतिदिन वढ्दै गएको देखिएको छ।

यसैबीच, आज (विहिवार) मात्र १५ हजार दर्शकले मेलाको अवलोकन गरेको छ।

महोत्सव सुरु भएदेखि हालसम्म १ लाख २३ हजार दर्शकहरुले महोत्सवको अवलोकन गरेको आयोजक सस्था लेखनाथ उद्योग बाणिज्य संघका अध्यक्ष विनोद श्रेष्ठको भनाई दाबी छ।

यसैबीच, महोत्सवको आठौ दिन (विहिवार)  कलाकारहरु राजु गुरुङ, पुर्णकला बिसी, जीवन दाहाल, पार्वती जिसी, रामजी पौडेल, रामप्रसाद ढकाल र वसन्ती थापाले प्रस्तुति दिएका थिए।

त्यसैगरी, हाँस्यकलाकारहरु युवराज भण्डारी र राजेन्द्र नेपालीको प्रस्तुतिले दर्शकहरुलाई पेट मिचीमिची हँसाएको थियो।

बेलुका कन्सर्टमा गायक आशिष राना ‘लाउरे’ को प्रस्तुतिले स्टेज तताएको थियो।

लाउरेको प्रस्तुति हुने भएपछि अपरान्हदेखि नै महोत्सवाम युवा युवतीहरुको उल्लेख्य उपस्थिति थियो।

शुक्रबार, कलाकारहरु पुष्कल शर्मा, सम्झना लामिछाने मगर, कुमार पुन, जीवन दाहाल, शिवहरी ढुंगाना, ईन्द्र गुरुङ, मिरा पोखरेल, अमर धितालको प्रस्तुति रहनेछ।

त्यस्तै, बेलुका कन्सर्टमा दुर्गेश थापा र अस्मिता अधिकारीको प्रस्तुति रहने कलाकार संयोजक उपेन्द्रराज सुवेदी ‘राजु’ ले जानकारी दिएका छन्।

महोत्सवको थप आर्कषणको रुपमा रहेको युगल नृत्य प्रतियोगिताअन्तरगत बिहिबारसम्म सहभागी २४ जोडीमध्ये १६ जोडी बाहिरिएका छन भने अन्तिम ८ जोडी अर्को चरणका लागि छनोट भएको खुल्ला युगल नृत्य प्रतियोगिताका संयोजक धिरजकुमार श्रेष्ठले जानकारी दिएका छन्।

उत्पादक र उपभोक्ताको संगमस्थलका रुपमा यस संस्करणको महोत्सवलाई लिइएको छ।

लेखनाथ महोत्सवको आयोजना लेखनाथ उद्योग बाणिज्य संघले गरेपनि यो महोत्सव गण्डकी प्रदेशकै नमुना र ऐतिहासिक महोत्सवका रुपमा परिचित भएको निवर्तमान अध्यक्ष छत्रधर आत्रेयको दावी छ।