राष्ट्रिय औद्योगिक व्यापार मेला तयारी अन्तिम चरणमा

राष्ट्रिय औद्योगिक व्यापार मेला तथा आइटी महोत्सवको तयारी अन्तिम चरणमा पुगेको छ।

पोखरा उद्योग वाणिज्य संघको आयोजनामा हुने ३३ औं संस्करणको ‘राष्ट्रिय औद्योगिक व्यापार मेला तथा आइटी महोत्सव’ यही माघ १० गतेदेखि सुरु हुँदैछ।

पोखरा उद्योग वाणिज्य संघले पोखरामा आज (मंगलबार) पत्रकार सम्मेलनको आयोजना गरी महोत्सवको तयारी अन्तिम चरणमा पुगेको जानकारी दिएको हो।

यस पटक मेलामा १२ औं क्यान इन्फोटेक–२०२५ तथा चौथो मोबाइल एक्सपो–२०२५ समेत समावेस गरेको जनाएको छ।

यसपटकको मेलालाई पृथक एंव चलायमान अर्थतन्त्रको आधारशिला र नवप्रवर्तनको केन्द्र बनाउने लक्ष्य लिएको संघका अध्यक्ष तथा महोत्सव कार्यसम्पादन समिति संयोजक गोकर्ण कार्कीले जानकारी दिएका छन्।

अध्यक्ष कार्कीका अनुसार विशेषगरी संपूर्ण राष्ट्रको औद्योगिक, हस्तकलाका उत्पादन, सूचना प्रविधि, शिक्षा, स्वास्थ, पर्यटनलगायत कृषिजन्य उत्पादनहरुलाई प्रवद्र्धन गर्न र यसको बजारीकरणमा समेत सघाउ पु-याउने गरी मेला आयोजना गरिदैँछ।

‘लगानीको समवद्र्धनः उद्योग व्यवसायको प्रवर्द्धन’ भन्ने नारा अनुरुप आयोजना हुने यस मेलामा सहकार्यको नयाँ अध्यायको सुरुवात गर्दै अन्य प्रदेशका निजि क्षेत्रले अबलम्बन गरेका असल अभ्यासलाई प्रदर्शन गर्दै सो क्षेत्रको लगानी गण्डकी प्रदेशमा आकर्षित गर्ने लक्ष्यसमेत लिइएको कार्कीले बताए।

यसका लागि नेपालको ७ वटै प्रदेशको पहिचान बोकेका औद्योगिक उत्पादन, संस्कृति एंव मौलिक रैथाने परिकारलाई समेत यस मेलामा समावेश गरिनेछ।

यस महोत्सवमा सूचना प्रविधिका क्षेत्रमा पछिल्लो समय आएका नयाँ आविष्कारहरू, कृतृम बुद्धिमत्ता (एआई), उन्नत सीसीटीभी प्रविधि, सफ्टवेयर निर्माण र बजारबारे जानकारी गराइनेछ।

चौथो मोबाइल एक्सपोअन्तर्गत ५० प्रतिशतसम्म छुटमा मोवाइल खरिद, एक्सचेञ्ज अफर, किस्तामा खरिद सुविधा र हरेक दिन ५ वटा डोर प्राइज उपलब्ध गराइनेछ।

अध्यक्ष कार्कीले गण्डकी प्रदेशसँगको समन्वयमा आयोजना हुने यस मेलाले गण्डकी प्रदेश सरकारले अगाडि सारेको दोस्रो पञ्चवर्षीय योजनामार्फत ‘आत्मनिर्भर र समुन्नत प्रदेशः सुखी प्रदेशबासी’को लक्ष्यप्राप्तिमा समर्पित रहने उल्लेख गरे।