टाइगर कप भलिबलः आज क्वालिफायर र एलिमिनेटरका खेलहरु हुँदै

पाँचौं संस्करणको एनसेल टाइगर कप राष्ट्रिय तथा अन्तर्राष्ट्रिय भलिबल प्रतियोगिताको आज (शुक्रबार) पहिलो क्वालिफायर र एलिमिनेटरका खेलहरु हुने भएका छन्।

टाइगर ग्रुप अफ पोखरा नेपालको आयोजनामा जारी प्रतियोगिताको सातौं दिन आज पुरुष र महिला दुबैतर्फ पहिलो क्वालिफायर र पुरुषतर्फ एलिमिनेटरको खेलहरु हुने तालिका छ।

पोखरा रंगशालास्थित भलिबल कोर्टमा हुने पहिलो खेल महिलातर्फको हुनेछ।

महिलातर्फ पहिलो क्वालिफायरमा आयोजक टाइगर ग्रुप र विभागीय सशस्त्र प्रहरी बल एपीएफबीच प्रतिस्पर्धा हुनेछ।

विभागीय एपीएफ अपराजित टोली हो भने आयोजक टोली टाइगर ग्रुप एकमात्र एपीएफसँग पराजित टोली हो।

यो खेलमा विजेता हुने टोली फाइनल पुग्नेछ भने पराजित हुने टोलीले एलिमिनेटर विजेता टिपटप न्यु–डायमण्ड स्पोर्ट्स क्लबसँग दोस्रो क्वालिफायर खेल्नेछ।

आजको दोस्रो खेल पुरुषतर्फको पहिलो क्वालिफायरको खेल हुनेछ।

बिहान ११ बजे सुरु हुने विभागीय डर्बीमा त्रिभुवन आर्मी क्लब र नेपाल पुलिस क्लबबिच हुनेछ।

आर्मीले समूह चरणको शीर्ष र पुलिसले दोस्रो स्थानमा रहँदै पहिलो क्वालिफायरमा स्थान पक्का गरेको हो।

आजको तेस्रो खेल पुरुषतर्फको एलिमिनेटर हुनेछ।

दिउँसो १ बजे सुरु हुने एलिमिनेटरमा गण्डकी प्रदेश र भारतको सुनिल भलिबल क्लबले प्रतिस्पर्धा गर्नेछन्।

एलिमिनेटरको विजेताले पुुलिस र आर्मीबिचको पराजित हुने टोलीसँग दोस्रो क्वालिफायर खेल्नेछ।