तनहुँको म्याग्दे गाउँपालिकामा लागत साझेदारी कार्यक्रम संचालन

तनहुँको म्याग्दे गाउँपालिकाले लागत साझेदारी कार्यक्रम संचालन गर्दैछ।

गाउँपालिकाले उत्पादनमूलक तथा रोजगारमूलक व्यवसायिक योजनामा आधारित कार्यक्रममा लागत साझेदारी अनुदान दिने भएको हो।

गाउँपालिकाको चालु आर्थिक वर्ष ०८१/०८२ को लागी स्वीकृत बजेट कार्यक्रमअन्तर्गत लोकप्रिय तथा उत्पादनमा आधारित अनुदान कार्यक्रमतर्फ ३० लाख तथा दुधालु गाई खरिद अनुदान लागत साझेदारी ५ लाख गरी जम्मा ३५ लाख रुपैयाँ वजेट विनियोजन गरेको छ।

गाउँकार्यपालिकाको गत फागुन ५ गतेको बैठकले उत्पादनमूलक तथा रोजगारमूलक ब्यवसायिक योजनामा आधारित लागत साझेदारी अनुदान कार्यक्रम संचालन गर्ने निर्णय गरेको हो।

उक्त कार्यक्रम कार्यन्वयन गर्न ईच्छुक १८ देखी ५९ वर्ष उमेर समुहका उत्पादन गरिरहेका ब्यवसायिक व्यक्ति तथा उत्पादनमूलक, रोजगारमूलक ब्यवसायिक योजना वनाएका अर्ध बेरोजगार/बेरोजगार र वैदेशिक रोजगारवाट फर्केका यस गाउँपालिकामा स्थायी वसोवास गर्ने युवाहरुलाई लक्षित गरी ४ वटा समुह बनाई २७ जना लाभग्राही छनौट गरी कार्यक्रम संचालन गरिने म्याग्दे गाउँपालिकाका प्रमुख प्रशासकीय अधिकृत नारायणप्रसाद अधिकारीले बताएका छन्।

उक्त कार्यक्रम संचालनका लागि गाउँपालिकाले मंगलबार १५ दिने सार्वजानिक सूचना प्रकाशित गरेको छ।

उक्त प्रकाशित सूचनाबमोजिम आगामी फागुन २७ गतेभित्र रितपूर्वकको निवेदन गाउँपालिकाको कृषि विकास उपशाखामा पेस गर्न गाउँपालिकाले सबैमा अनुरोध गरेको छ।

उक्त कार्यक्रमअन्तर्गत ठूला ब्यवसायतर्फ कृषि, पशु, पर्यटन, उद्यमलगायतका क्षेत्रहरुमा क्षेत्रगत पूर्वाधार निर्माण र आय–आर्जनको लागि पशुधन खरिद, प्रविधि खरिद र आय–आर्जन र रोजगारमूलक कार्यक्रम गर्न चहाने कूल पुँजी ५० लाख वा सो भन्दा वढी लगानी भएको र आफूसहित कम्तिमा ३ जनालाई रोजगारी दिएको व्यक्तिलाई ५० प्रतिशत अनुदानको रकम ५ लाख रुपैयाँ उपलब्ध गराइने सूचनामा उल्लेख छ।

त्यस्तै, मझौला व्यवसाय अन्तर्गत कृषि, पशु, पर्यटन, उद्यमलगायतका क्षेत्रहरुमा क्षेत्रगत पूर्वाधार निर्माण आय–आर्जनको लागि पशुधन खरिद प्रविधि खरिद र आय–आर्जन र रोजगारमूलक कार्यक्रम र साना व्यवसायअन्तर्गत र स्वरोजगारतर्फ कृषि पशु, पर्यटन, उद्यमलगायतका क्षेत्रहरुमा क्षेत्रगत पूर्वाधार निर्माण आय–आर्जनको लागि पशुधन खरिद प्रविधि खरिद र आय–आर्जन र रोजगारमूलक कार्यक्रमको लागि पनि लागत साझेदारीको ५० प्रतिशत अनुदान उपलब्ध गराइने गाउँपालिकाका प्रमुख प्रशासकीय अधिकृत अधिकारीले बताएका छन्।

उक्त कार्यक्रममा सहभागी हुनको लागि निवेदनका साथ संक्षिप्त व्यवसायिक कार्ययोजनासहित आर्थिक र प्राविधिक प्रस्ताव, नेपाली नागरिकताको प्रमाणित प्रतिलिपि, गर्न चाहेको पेशा, व्यवसाय सम्वन्धित निकाय तथा गाउँपालिकामा दर्ता भएको प्रमाणको प्रतिलिपि, अन्य प्रमाणित प्रमाण–पत्रहरु (तालिम, शैक्षिक योग्यता, अनुभव, घरजग्गा भाडा सम्झौतापत्र आदी) को प्रतिलिपिहरु, वैदेशिक रोजगारबाट फर्केका युवाहरुको हकमा पासपोर्टको प्रतिलिपि, कार्यक्रम कार्यान्वयन गर्ने प्रतिवद्धता र सम्बन्धित वडाका सिफारिसहरु पेश गर्नुपर्ने गाउँपालिकाले जनाएको छ।