‘सामाजिक सञ्जालको अधिकार एक इन्च पनि कटौती हुँदैन’

प्रधानमन्त्री केपी शर्मा ओलीले सामाजिक सञ्जालको अधिकार एक इन्च पनि कटौती नहुने बताएका छन्।

काठमाडौंमा आज (बिहीबार) सुरु डिजिटल अपराधसम्बन्धी अन्तर्राष्ट्रिय सम्मेलनमा बोल्दै उनले जिकिर गरेका छन्, ‘सामाजिक सञ्जालको अधिकार एक इन्च पनि कटौती नहुने गरी विधेयक ल्याइएको छ।’

छाडातन्त्र, अराजकता र समाजलाई विकृत बनाउने, सभ्यता, संस्कृति, गौरवपूर्ण परम्परालाई होच्याउने र अपमान गर्ने विषय भने स्वीकार्य नहुने उनले स्पष्ट पारे।

‘कसैको व्यवहार, कारोबार बर्बाद गरिदिने, परिवार छिन्न–भिन्न बनाइदिने, जिन्दगी बदनाम, अविश्वास फैलाउने, भ्रम छरिदिनेलगायत विषय नियन्त्रण गरेरै छाडिनेछ’, प्रधानमन्त्री ओलीले प्रतिबद्धता जनाएका छन्।

उनले अगाडि भने, ‘सामाजिक मर्यादाहरू सबै भत्काएर घृणाको राजनीति, घृणाको क्रियाकलाप, कसैको व्यवहार, कारोबार बर्बाद गरिदिने, कसैका परिवार छिन्न–भिन्न बनाइदिने, कसैको जिन्दगी बदनाम गरिदिने, अविश्वास फैलाइदिने, भ्रम छरिदिने यस प्रकारका कामहरू निरन्तर चलिरहेका छन्। ती नियन्त्रण हुनुपर्छ। यस्ता कुराहरूहरुलाई छाड्नु हुँदैन।’

प्रधानमन्त्री ओलीले अपराध नियन्त्रण हुनुपर्छ भनेर लाग्दा विरोध गर्नु आफैँमा स्तरहीन तर्क रहेको दाबी गरे।

महान्यायाधिवक्ता कार्यालयले डिजिटल अपराध नियन्त्रण, अनुसन्धान, अभियोजन तथा न्यायिक प्रक्रियामा अन्तरराष्ट्रिय सहकार्य प्रवद्र्धन गर्ने उद्देश्यले ‘डिजिटल अपराधसम्बन्धी अन्तर्राष्ट्रिय सम्मेलन’ को आयोजना गरेको हो।

यो अन्तर्राष्ट्रिय सम्मेलन आज (फागुन १५) र भोली (फागुन १६) गरी सम्मेलन २ दिनसम्म चल्नेछ।

सम्मेलनमा डिजिटल अपराध अनुसन्धान, अभियोजन तथा न्यायिक प्रक्रियालाई प्रभावकारी बनाउन अन्तर्राष्ट्रिय अनुभव आदान–प्रदान गर्दै कानूनी, नीतिगत तथा संस्थागत सुधारको मार्गचित्र तय गर्ने बताइएको छ।

सम्मेलनमा नेपाल, संयुक्त अधिराज्य (बेलायत), नेदरल्यान्ड्स, मलेसिया, साउदी अरेविया, सिङ्गापुर, माल्दिभ्स, दक्षिण कोरिया, अजरबैजान, भारत, चीन, श्रीलंका, नर्वे, रुसलगायत १३ राष्ट्रका ९० भन्दा बढी सरकारी वकिल, कानूनविज्ञ, न्यायाधीश तथा सम्बन्धित निकायका उच्च अधिकारीको सहभागिता रहनेछ।

साथै, नेपालका तर्फबाट सर्वोच्च अदालत, नेपाल राष्ट्र बैंक, विभिन्न मन्त्रालय, सरकारी वकिल तथा अन्य सम्बन्धित निकायका अधिकारीहरुको सहभागित रहनेछ।

सम्मेलनका विभिन्न सत्रमा १६ वटा कार्यपत्र प्रस्तुत हुनेछन्।

सम्मेलनमा डिजिटल प्रविधिको माध्यमबाट गरिने अपराधको विविध आयामका साथै अनुसन्धान, अभियोजन र न्यायिक निरुपणका प्रभावकारी विधिको विषयमा गहन छलफल गरिने कार्यक्रम छ।

प्रविधिको तीव्र विकाससँगै डिजिटल प्रविधिको दुरुपयोग गर्दै हुने अपराधको कसुर वारदातको तरह थप जटिल, विभिन्न प्रकारका कसुर अन्तरसम्बन्धित तथा संगठित बन्दै गएको हुँदा सम्मेलनमा प्रविधिमार्फत हुने यौनजन्य हिंसा, साइवर अपराध, डिजिटल ठगी तथा वित्तीय अपराध, अनलाइन शोषण, व्यक्तिगत गोपनीयता उल्लंघन, डिजिटल प्रमाण संकलन विधि, अन्तर्राष्ट्रिय कानूनी सहकार्य तथा साइबर कानूनी नीति निर्माण जस्ता विषयमा कार्यक्रम प्रस्तुत हुनेछन्।

प्रधानमन्त्री केपी शर्मा ओलीले उद्घाटन गरेको सम्मेलन गृहमन्त्री रमेश लेखकले समापन गर्ने कार्यक्रम छ।