प्याराग्लाइडिङका युकेश र महिला फुटबलकी सावित्रा उत्कृष्ट पल्सर वर्ष खेलाडी ( हेर्नुहोस, फोटो फिचर समेत )

पोखरा । प्याराग्लाइडिङका युकेश गुरुङ र महिला फुटबलकी सावित्रा भण्डारी पल्सर स्पोर्ट्स अवार्ड–२०७५ मा उत्कृष्ट वर्ष खेलाडी बनेका छन् ।

नेपाल खेलकुद पत्रकार मञ्चले राजधानीको कमलादीस्थित प्रज्ञा भवनमा मंगलबार आयोजना गरेको १६ औ संस्करणको अवार्ड कार्यक्रममा युकेशले उत्कृष्ट पुरुष खेलाडीको पल्सर स्पोर्ट्स अवार्ड २०७५ को अवार्ड जितेका हुन् ।

यस अवार्डको लागि जुडोका इन्द्रबहादुर श्रेष्ठ, क्रिकेटका पारस खड्का र सोमपाल कामी तथा गल्फमा शुक्रबहादुर राई मनोनयनमा परेका थिए ।

युकेश, इन्डोनेसियामा सम्पन्न १८ औं एसियाली खेलकुदमा प्याराग्लाइडिङ क्रस कन्ट्रीको पुरुष टिम इभेन्टका रजत पदक विजेता हुन् । एसियाडमा नेपाललाई २० वर्षपछि रजत दिलाउँदा पाँच मध्येका प्रमुख खेलाडी युकेशले डेब्यु खेलमै सर्वाधिक स्कोर गरेका थिए ।

त्यसैगरी, महिला फुटबल खेलाडी सावित्रा भण्डारीले पल्सर स्पोर्ट्स अवार्ड २०७५ को उत्कृष्ट महिला खेलाडी अवार्ड जितेकी छिन् ।

यस अवार्डको लागि जुडोकी मनिता श्रेष्ठ प्रधान, क्रिकेटकी सिता रानामगर, तेक्वान्दोकी निमा गुरुङ र भलिबलकी सरस्वती चौधरी मनोनयनमा परेका थिए ।

भारतमा भएको अन्तर्राष्ट्रिय हिरो गोल्डकपमा नेपाललाई उपविजेता बनाउन महत्वपूर्ण योगदान दिएकी सावित्राले भारतलाई इतिहासमा पहिलो पटक २–१ ले हराउँदा दुबै गोल गरेकी थिइन् ।

सावित्राले नेपाललाई पहिलो पटक ओलम्पिक छनोटको दोस्रो चरणमा प्रवेश गराउनमा मुख्य भूमिका खेलेकी थिइन् । सावित्रा, विराटनगरनमा सम्पन्न महिला साफ च्याम्प्यिनसिपमा उपविजेतासहित सर्वाधिक गोलकर्ता समेत बनेकी थिइन् । सावित्रा, महिला फुटबल लिग २०७५ मा सर्वोत्कृष्ट र सर्वाधिक गोल गर्ने खेलाडी समेत बनेकी थिइन् ।

एथ्लेटिक्सका प्रशिक्षक हरिबहादुर रोकाया स्पोर्ट्स अवार्डमा लाइफटाइम एचिभमेन्ट अवार्डबाट सम्मानित भएका छन् । रोकायाकै प्रशिक्षणमा रहेका थुप्रै नेपाली खेलाडीहरुले हालसम्म पनि आफ्नो प्रदर्शनलाई उच्च राखेका छन् ।

पाराग्लाइडिङका योगेश भट्टराईले पल्सर स्पोर्टस अवार्डको उत्कृष्ट प्रशिक्षक अवार्ड जिते । उत्कृष्ट प्रशिक्षक विधामा एथ्लेटिक्सका धनिराम चौधरी, फुटबलका हरि खड्का, क्रिकेटका जगत टमाटा र भलिबलका ज्ञानेन्द्र बिष्ट मनोनयनमा थिए ।

२० बर्षपछि नेपाललाई एसियाली खेलकुदमा रजत पदक दिलाउँदा मुख्य प्रशिक्षक रहेका योगेशले नेपालमा भएको प्याराग्लाइडिङ एक्युरिसी वल्र्डकपमा नेपाली टोलीलाई काश्य पदक जिताउन सफल भएका थिए । दक्षिण कोरियामा भएको प्रि–वल्र्डकप क्रस कन्ट्रीमा नेपाली टोलीको मुख्य प्रशिक्षक थिए ।

स्पोर्ट्स अवार्डको ‘टिम अफ द इयर’को उपाधि पाराग्लाइडिङले जितेको छ । एसियाली खेलकुदमा पदकविहीन बनेको नेपालले प्याराग्लाइडिङबाट रजत पदक जितेको थियो ।

नेपाली राष्ट्रिय फुटबल टोलीका भरपर्दा खेलाडी रोहित चन्द ‘पल्सर स्पेशल अवार्ड’बाट सम्मानित भए । रोहितको अनुपस्थितिमा दाजु रविन्द्र चन्दले अवार्ड ग्रहण गरेका थिए । इन्डोनेसियामा व्यवसायिक फुटबल खेलिरहेका चन्द गत वर्ष आफ्नो क्लब पर्सिजा जकार्तालाई लिग उपाधि जिताउँदा लिगकै सर्वोत्कृष्ट खेलाडी बनेका थिए ।

एथ्लेटिक्सका अजितकुमार यादवले स्पोर्टस अवार्डको ‘युथ प्लेयर अफ दि इयर’को अवार्ड जिते । युथ अवार्डका लागि मनोनयनमा क्रिकेटका ललितनारायण राजवंशी, ब्याडमिन्टनका प्रिन्स दाहाल, फुटबलकी मन्जलीकुमारी योन्जन र कराँतेका विजय श्रेष्ठ थिए ।

अजितकुमार, हङकङमा सम्पन्न तेस्रो एसियन युथ एथ्लेटिक्स च्याम्पियनसीपको ३ हजार मिटर दौडका कीर्तिमानी स्वर्ण विजेता खेलाडी हुन् । उनले कतारमा भएको २३ औं एसियन एथ्लेटिक्स च्याम्पियनसीपमा राष्ट्रि«य कीर्तिमानमा सुधार गरेका थिए । राष्ट्रपति रनिङ शिल्डमा ३ हजार मिटर र १५ सय मिटर दौडमा स्वर्ण विजेता अजितकुमारले काठमाडौं म्याराथन ५ किमी खुला रोड रेस, बन्दीपुर रोड रेस ८ किमी दौड र मदनभण्डारी रोडे रेस ५ किमिमा स्वर्ण पदक जितेका थिए ।

महिला भलिबलकी रेश्मा भण्डारीले स्पोर्ट्स अवार्डको पिपुल्स च्वाइस अवार्ड उपाधि जितिन् । यस उपाधिका लागि फुटबलकी सावित्रा भण्डारी, ब्याडमिन्टनका प्रिन्स दाहाल, शारिरीक सुगठनका महेश्वर महर्जन र क्रिकेटका सन्दीप लामिछाने मनोनयनमा थिए । रेश्माले कूल मतको ३२ प्रतिशत मत प्राप्त गरेकी थिइन् । दोस्रो स्थानकी सावित्रा भण्डारी २९ प्रतिशत मतमा सीमित रहिन् ।

दृष्टिविहिन क्रिकेटर मनकेसी चौधरीले स्पोर्ट्स अवार्डको पारा एथ्लिट अवार्ड उपाधि जितिन् । पाकिस्तानमा भएको मैत्रीपूर्ण सिरिजमा उत्कृष्ट प्रदर्शन गर्दै मन केसी ‘प्लेयर अफ द सिरिज’ बनेकी थिइन् ।

पाकिस्तानी खेल पत्रकार अम्जद अजिज मलिक स्पोर्टस अवार्डको अन्तर्राष्ट्रिय खेल पत्रकारबाट सम्मानित भएका छन् । एआइपीएस एसियाका महासचिव समेत रहेका मलिक पाकिस्तान स्पोर्ट्स राइटर्स एशोसिएसनका अध्यक्ष समेत हुन् ।

तस्वीर : सुदर्शन रञ्जित