‘आफ्नो हक प्रयोग गर्दा अरुको अधिकार खोसिनु हुँदैन’

प्रेस काउन्सिल नेपालका अध्यक्ष बालकृष्ण बस्नेतले आफ्नो हकको उपयोग गर्दा अरुको अधिकार हनन् भए/नभएको तर्फ गंभीर बन्न सबैलाई सुझाव दिएका छन्।

काउन्सिलमा आइतबार आयोजित एक कार्यक्रममा अध्यक्ष बस्नेतले सामाजिक सञ्जालबाट संविधानले सुनिश्चित गरेका नागरिकका हक, अधिकार हनन् हुने गरी प्रहार गर्ने काम भएकोमा आपत्ति जनाए।

उनले भने, ‘सामाजिक सञ्जालको मर्यादित प्रयोग हुनुपर्छ। आफ्नो हक प्रयोगले अरु मानिसको अधिकारलाई हनन् गर्नु हुँदैन। तर, पछिल्ला दिनहरूमा व्यक्तिको सम्मानपूर्वक बाँच्न पाउने अधिकार कुल्चिने गरी अफवाह फैलाउने काम भएका छन्। संचार माध्यमले यसतर्फ चनाखो हुनुपछ।’

नयाँ खुलेका अनलाइन र युट्युब च्यानललाई अभिमुखीकरण दिने क्रममा उनले सामाजिक सञ्जाल र संचार माध्यममा भिन्नता छुट्याएर संचारकर्मीले काम गर्नुपर्ने बताए।

सामाजिक सञ्जाल मात्र चलाउने डिजिटल प्लेटफर्म र संचार माध्यममा प्रष्ट फरक गराउन सके यसको नियमनमा समेत सहज हुने उनको सुझाव थियो।

विषयविज्ञका रूपमा सहभागी अन्नपूर्ण पोष्ट दैनिकका समाचार सम्पादक नरेन्द्र साउद र नेपाल टेलिभिजनका वरिष्ठ सम्पादक शालिक सुवेदीले सामाजिक सञ्जाल प्रयोग गर्ने संचार माध्यमले आचारसंहिताको पालना गर्नु जरुरी भएको औंल्याए।

साउदले प्रेस काउन्सिलबाट हुने यस्ता अभिमुखीकरण कार्यक्रमलाई जिल्लाव्यापी बनाउन सुझाव दिए।

उनले पत्रकारले के गर्न हुने, के नहुनेबारे सहजीकरण गरेका थिए।

त्यस्तै, पत्रकार सुवेदीले विभिन्न संचार निर्देशिकाबारे प्रष्ट पारेका थिए।