४ देशीय महिला क्रिकेट: नेपाल घरेलु युगान्डासँग पराजित

४ देशीय महिला टी–२० क्रिकेटमा नेपाल घरेलु युगान्डासँग पराजित बनेको छ।

युगान्डामा भइरहेको ४ देशीय वुमन्स डे कप टी–२० अन्तर्राष्ट्रिय क्रिकेट श्रृंखलामा आज (बिहीबार) नेपाल फेरि पराजित भएको हो।

युगान्डा एन्टेब्बे क्रिकेट ओभलमा भएको पाँचौँ खेलमा नेपाल घरेलु राष्ट्र युगाण्डासँग ४० रनले पराजित भएको हो।

जारी प्रतियोगितामा नेपालको यो चौथो हार हो।

युगान्डासँग भने पहिलो पटक हार ब्यहोरेको हो।

यसअघि, आइतबार भएको घरेलु युगान्डासँगको पहिलो रोमाञ्चक खेलमा भने नेपाल १ विकेटले विजयी बनेको थियो।

९२ रनको लक्ष्य पछ्याएको नेपाल १७ ओभर १ बलमा ५१ रनमा अल आउट बन्यो।

नेपालका लागि कविता जोशीले सर्वाधिक १२ रन बनाइन्।

त्यसैगरी, कप्तान इन्दु बर्माले ११ रन थपिन्।

त्यसबाहेक अरु ब्याटरले दोहोरो अंकमा रन बनाउन सकेनन्।

त्यसअघि, टस जितेर पहिले ब्याटिङ गरेको युगाण्डाले निर्धारित ओभरमा ५ विकेट गुमाएर ९१ रन बनाएको थियो।

युगाण्डाका लागि रिता मुसामालीले सर्वाधिक ३८ रन बनाइन्।

स्थर लियोक्वले २२ रन जोडिन्।

नेपालका रिया शर्माले २ विकेट लिइन्।

रुविना क्षेत्री, पूजा महतो र इश्वरी बिष्टले समान १/१ विकेट लिए।

प्रतियोगितामा भोली (शुक्रबार) नेपाल र हङकङ खेल्दैछन्।