पोखरामा २० औं संस्करणको फेवा महोत्सव हुँदै

पर्यटनको राजधानी पोखरामा पर्यटक आकर्षण गर्न फेवा नव बर्ष महोत्सव–२०८२ हुने भएको छ।

पर्यटनको दोश्रो सिजनको रुपमा मानिने यस मौसममा आन्तरिक तथा बाह्य पर्यटकलाई आकर्षण गर्न यस बर्षपनि नेपाली नयाँ बर्षको अवसरमा उक्त महोत्सव हुने भएको आज (सोमबार) पोखरामा आयोजित पत्रकार भेटघाट कार्यक्रममा जानकारी गराइएको हो।

होटल संघ पोखरा नेपालले यही चैत ३० गतेदेखि आगामी बैशाख १ गतेसम्म पोखरामा आयोजना गर्न लागेको २० औं फेवा नव बर्ष महोत्सव–२०८२ को तयारी तीव्र रुपमा अगाडि बढाइएको संघले जनाएको छ।

महोत्सवका संयोजक एवं संघका अध्यक्ष लक्ष्मण सुवेदीले महोत्सवका अवसरमा संघअन्तर्गतका सदस्य होटलमा रात बिताउने पाहुनालाई प्रचलित दर रेटमा २० प्रतिशतसम्म छुट प्रदान गरिने जनाए।

यसैगरी, संघले महोत्सवकै प्रचारका लागि हालै पूर्वी नेपालमा ‘जाउँ है पोखरा’ अभियान सम्पन्न गरेको र पश्चिम नेपालमा पनि यस्तो अभियान छिट्टै संचालन गरिने जानकारी उनले गराए।

‘जाउँ है पोखरा’ अभियान र फेवा नव वर्ष महोत्सव जस्ता कार्यक्रमकै कारण पोखरा आउने आन्तरिक पर्यटक हाल ४० प्रतिशत पुगेको तथ्यांक पनि उनले दिएका छन्।

दुई दशकअघि यस्तो संख्या ३ प्रतिशत मात्र रहेको उनले सुनाए।

पोखराका होटलमा अहिले पाहुनाको समग्र अकुपेन्सी दर ४० प्रतिशत हाराहारी रहेको जानकारी पनि अध्यक्ष सुवेदीले गराए।
भारतीय पर्यटकको संख्या पनि उल्लेख्य रहेको उनले बताए।

पोखराका १ हजार २ सय होटलमा ४० हजार विस्तारा रहेको र यहाँको होटल क्षेत्रमा मात्र ५ खर्ब रुपैयाँ हाराहारी लगानी रहेको संघको आंकलन छ।

स्थानीय ड्यामसाइडदेखि खहरेसम्म सडकमा नै संचालन हुने महोत्सवमा नि:शुल्क प्रवेशको व्यवस्था गरिएको छ।

नेपाली संस्कृतिको संरक्षण र परम्परागत नेपाली खानाको प्रवद्र्धन गर्ने मुख्य उद्देश्यसहित ‘पर्यटन, संस्कृति र खाना’ भन्ने नारासहित यो महोत्सव हुन लागेको संघका महासचिव राजेन्द्र ढकालले जानकारी दिएका छन्।

रैथाने र परम्परागत खानाको प्रदर्शनी, सांस्कृतिक कार्यक्रम, मनोरञ्जन र खेलकूदका कार्यक्रम, पर्यटक दौड, पप कन्सर्ट, कृषि र हस्तकलाका सामग्रीको प्रदर्शनी र लोकदोहोरीका कार्यक्रम महोत्सवका प्रमुख आकर्षण रहनेछन्।

पर्यटनको राजधानी पोखरामा ‘पोखरा भ्रमण वर्ष–२०२५’ चल्दै गर्दा हुन लागेको यो महोत्सवले फेवा तालको संरक्षण गर्दै आन्तरिक एवं वाह्य पर्यटन प्रबद्र्धन गर्ने उद्देश्य पनि लिएको छ।

अंग्रेजी नयाँ वर्ष जस्तै नेपाली नयाँ बर्षपनि उत्तिकै उल्लासका साथ मनाउने र यसको प्रचार–प्रसार गरी आफ्नो मौलिक संस्कृतिको रक्षा गर्ने अभिप्राय पनि महोत्सवले लिएको छ।

सांस्कृतिक झाँकीसहित अम्मटमा महोत्सवको उद्घाटन कार्यक्रम हुनेछ।

महोत्सवलाई पोखरा महानगरपालिका, होटल संघ नेपाल, गण्डकी प्रदेश सरकार र नेपाल पर्यटन बोर्डले सघाउनेछन्।

पत्रकार सम्मेलनमा नेपाल पर्यटन बोर्ड गण्डकीका प्रमुख मणिराज लामिछानेले फेवा महोत्सवले पोखराको पर्यटन प्रवद्र्धनमा टेवा पुग्ने उल्लेख गरे।

आयोजक संघको सल्लाहकार परिषद्का सदस्य एवं होटल संघ नेपालका केन्द्रीय सदस्य भरतराज पराजुलीले सकारात्मक माहोलले पर्यटनलाई अगाडि बढाउन मद्दत पुग्ने बताए।