पोखरा र चीनका पर्यटन व्यवसायीबीच व्यावसायिक साझेदारी

पोखरा र चीनको सिचुवान प्रान्तको छेन्दु सहरका पर्यटन व्यवसायीबीच व्यावसायिक साझेदारी बिटुबी (बिजनेस टु बिजनेस) एवं ‘सेल्स मिसन’ गरिएको छ।

पोखरा अन्तरराष्ट्रिय विमानस्थलबाट पहिलो व्यावसायिक चार्टर्ड उडानमार्फत छेन्दु पुगेका पर्यटन व्यवसायी र छेन्दुका पर्यटन व्यवसायीबीच नेपाल पर्यटन बोर्डले बिटुबी एवं सेल्स मिसन कार्यक्रमको आयोजना गरेको हो।

पोखरा पर्यटन परिषद् र छेन्दुस्थित महावाणिज्यदूतावाससँगको सहकार्यमा गरिएको कार्यक्रममा दुवै देशका पर्यटन व्यवसायीले सिचुवान एयरलायन्सको उडान नियमित हुनुपर्नेमा जोड दिए।

व्यवसायीले पर्यटकीय साझेदारीका लागि तयार भएको बताए।

छेन्दुका पर्यटन व्यवसायीले पोखराको प्राकृतिक सुन्दरताको प्रशंसा व्यक्त गरे।

चिनियाँ पर्यटक लक्षित पूर्वाधारलगायतमा जोड दिन आग्रह गरे।

कार्यक्रममा पोखरा महानगरपालिकाका प्रमुख धनराज आचार्यले नेपालको पर्यटन राजधानी पोखराबाट मित्रराष्ट्र चीनको छेन्दुुसम्म पहिलो व्यावसायिक चार्टर्ड उडान सुरु भएकोमा आफूहरू उत्साहित बनेको बताए।

नेपाल र चीनबीचको मैत्रीपूर्ण सम्बन्ध हिमाल जत्तिकै उच्च, सागर जत्तिकै गहिरो र आकाश जत्तिकै फराकिलो रहेको प्रमुख आचार्यको भनाई थियो।

उनले यो सम्बन्ध भृकुटी र स्रङचङ गम्पो र अरनिकोजस्ता ऐतिहासिक व्यक्तित्वहरूको समयदेखि नै विस्तार भएको उल्लेख गरे।

महानगरप्रमुख आचार्यले नेपाल र चीनबीचको मैत्री सम्बन्ध कायम भएको ७० औँ वर्षगाँठ मनाइरहँदा ‘नेपाल भ्रमण वर्ष–२०२५’ घोषणा गरेकोमा धन्यवाद व्यक्त गरे। पोखरा महानगरपालिकाले यस वर्षलाई ‘पोखरा भ्रमण वर्ष–२०२५’ मनाइरहँदा अझ धेरै विशेष बन्न पुगेको उल्लेख गरे।

उनले भने, ‘सिचुवान प्रदेश विश्वप्रसिद्ध चिया, जाइन्ट पाण्डा र बुद्धको ऐतिहासिक धरोहरहरूले विश्वभरका पर्यटकमाझ आकर्षणको केन्द्र बनेको छ। नेपाली पर्यटक पनि यहाँको समद्ध संस्कृति र प्राकृतिक सुन्दरता अनुभव गर्न लालयित भएको छ।’

उक्त चार्टर्ड उडानले नेपाली पर्यटक सिचुवान आउन र त्यहाँका आकर्षणहरू अनुभव गर्न सहज र सजिलो बनाउने उनले विश्वास व्यक्त गरे।

यसबाट छेन्दुका पर्यटकहरू सोझै पोखरा जाने र नेपालका पर्यटक पनि छेन्दुको समृद्ध संस्कृति र प्राकृतिक सुन्दरता अनुुभव गर्न आउने उनको भनाई छ।

प्रकृति, संस्कृति र साहसिक पर्यटनको गन्तव्य पोखरामा पोखरा भ्रमण वर्षका अवसरमा विभिन्न पर्यटकीय प्याकेजमा विशेष छुटका योजना पनि सार्वजनिक गरिसकिएको उनले बताए।

सिचुवान प्रान्तका परराष्ट्र विभागका उपमहानिर्देशक लिउ मिनले सिचुवान एयरलायन्सले सुरु गरेको व्यावसायिक चार्टर्ड उडान नियमित हुनेमा विश्वास व्यक्त गरे।

दुई देशबीचको ऐतिहासिक सम्बन्धलाई आगामी दिनमा थप प्रगाढ बनाउनका लागि उडानको निरन्तरतासँगै दुई देशका पर्यटन व्यवसायीबीचको साझेदारी महत्वपूर्ण बन्ने उनले विश्वास व्यक्त गरे।

पोखरा पर्यटन परिषद्का अध्यक्ष तारानाथ पहारीले पोखरा छेन्दु उडानले दुवै देशबीचको पर्यटकीय साझोदारीलाई बढाउने बताए।

यो उडानलाई नियमित गराउने कुरामा आफूहरू निरन्तर लाग्ने उनले बताए।

उनले भने, ‘यसमा छेन्दुका पर्यटन व्यवसायीको पनि सकारात्मक साथ र सहयोग हुनेछ। छेन्दुुमा गरिएको ‘बिटुबी एवं सेल्स मिसन’ बाट दुुवै देशका पर्यटन व्यवसायीबीच आपसी मित्रतालाई अझै मजबुत बनाउने विश्वास दिइएको छ।’

नेपाल पर्यटन बोर्ड गण्डकी प्रदेशका प्रमुख मणिराज लामिछानेले प्रकृति, संस्कृति र साहसिक पर्यटनको गन्तव्य पोखरा चिनियाँ पर्यटकले पनि रुचाइएको गन्तव्य भएको उल्लेख गरे।

पोखरामा धेरै चिनियाँ पर्यटक भित्राउनका लागि पोखरा–छेन्दु उडानको निरन्तरता आवश्यक छ। प्राकृतिक सुन्दरतासँगै साहसिक पर्यटनका विभिन्न गतिविधि पोखरामा पाइन्छ’, उनले भने।

छेन्दुुस्थित नेपाली महावाणिज्यदूतावासका महावाणिज्यदूूत सुरेश राउतले पोखरा काठमाडौँपछिको दोस्रो ठूलो सहर भएको बताए।
यो नेपालकै महत्वपूर्ण पर्यटकीय गन्तव्य भएको बताए।

उनले भने, ‘पोखरा–छेन्दु उडानलाई नियमित बनाउनका लागि महावाणिज्यदूतावासका तर्फबाट गर्न सकिने सहयोगका लागि आफूहरू तयार रहेको छ।

पोखरा पर्यटन परिषद्का महासचिव जीवनराज सापकोटाले पोखरामा चिनियाँ पर्यटक लक्षित पूर्वाधारहरू विस्तार हुने क्रम पनि बढिरहेको बताए।

आगामी दिनमा चिनियाँ पर्यटकको आगमन बढ्नेमा उनको विश्वास छ।