रेडियो नेपालको ७५ औँ हीरक महोत्सव

सार्वजनिक सेवा प्रसारण नेपालअन्तर्गतको रेडियो नेपालको ७५ औँ हीरक महोत्सव मनाउँदैछ।

नेपालको पहिलो प्रसारण संस्था रेडियो नेपाल आज (बुधबार) देखि औपचारिक प्रसारणको ७५ औँ वर्षमा प्रवेश गरेको छ।

विसं २००७ फागुन ७ गते प्रजातन्त्रको स्थापना भएलगत्तै विसं २००७ चैत २० गते रेडियो नेपालको स्थापना भएको थियो।

समावेशी आवाज बनेको रेडियो नेपालबाट २५ भाषामा समाचार र २४ भाषामा कार्यक्रमसहित सातवटै दिनमा २४ सै घण्टा प्रसारण हुँदै आएको छ।

सार्वजनिक सेवा प्रसारण संस्थाका रूपमा स्तरोन्नति भएको रेडियो नेपालले राष्ट्रिय एकता, विपदमा नागरिकको रक्षा र समृद्धिमा केन्द्रीत भएर

विषयवस्तु र प्रस्तुतिलाई नयाँ स्वरूपमा लैजाने प्रयास गरिरहेको छ।

संचार तथा सूचना प्रविधि मन्त्री पृथ्वीसुब्बा गुरुङले काठमाण्डौंमा आज (बुधबार) एक समारोहलाई सम्बोधन गर्दै सत्ताको नभई देश र जनताको पक्षमा रेडियो नेपालले काम गर्नुपर्नेमा जोड दिए।

‘पीएसबी मोडल’ मा संचालन भएको रेडियो नेपालले सत्ताभन्दा देश र जनताको पक्षमा काम गर्नुपर्ने स्पष्ट पारे।

मन्त्री गुरुङले रेडियो नेपालले अब कुनैपनि राजनीतिक नेता तथा पार्टीको गुणगान गाउन आवश्यक नभएको उल्लेख गरे।

उनले निर्देशन दिए, ‘सत्यतथ्य र आधिकारिक सूचना सम्प्रेषण गरी आमजनतालाई सुसूचित गर्नुहोला। मुलुकभित्रको विविधतामा एकता खोजी समावेशी चरित्रको भूमिका निर्वाह गर्दै देशका सबै वर्ग, क्षेत्र र पक्षले अपनत्व गर्ने संचार गृहका रुपमा रेडियो नेपाललाई स्थापित गराउनुहोला।’

सार्वजनिक सेवा प्रसारण नेपाल ‘पीएसबी’ का कार्यकारी अध्यक्ष डा महेन्द्र विष्टले रेडियो नेपालको पहुँच विस्तार कार्य तीव्र बनाउनुका साथै जनताले पाउनुपर्ने सत्यतथ्य सूचनाको हकलाई प्रत्याभूति गर्ने प्रतिबद्धता जनाए।

विष्टले समयको माग र सूचना प्रविधिको विकाससँगै रेडियो नेपालको कार्यशैलीमा परिवर्तन गरेको जानकारी दिए।

कार्यकारी अध्यक्ष डा विष्टले स्पष्ट पारे, ‘संघीय समावेशी अवधारणालाई आत्मसाथ गरी मुलुकका सबै पक्षको अपनत्व हुनेगरी सेवा प्रवाह गरिरहेको छ।’

सो अवसरमा रेडियो नेपालमा २५ वर्ष सेवा गरेका कर्मचारी, उत्कृष्ट कर्मचारी र गीतसंगीत क्षेत्रका उत्कृष्ट स्रष्टाहरूलाई पुरस्कारसहित सम्मान गरेको थियो।