संविधानमा पूर्ण प्रेस स्वतन्त्रताको सुनिश्चितता छ: राष्ट्रपति पौडेल

राष्ट्रपति रामचन्द्र पौडेलले संविधानमा पूर्ण प्रेस स्वतन्त्रताको सुनिश्चितता रहेको स्पष्ट पारेका छन्।

सार्वजनिक सेवा प्रसारण संस्था, रेडियो नेपालको हीरक महोत्सवलाई आज (बुधबार) सम्बोधन गर्दै राष्ट्रपति पौडेलले भने, ‘नेपालको लोकतान्त्रिक आन्दोलनमा पत्रकार र संचारमाध्यमको महत्त्वपूर्ण भूमिका रहेको छ। संचार जगतको यो महत्वपूर्ण र गंभीर जिम्मेवारीलाई बोध गरेर संविधानमा पूर्ण प्रेस स्वतन्त्रताको सुनिश्चित गरिएको छ।’

उनले आफू र आफ्ना पुस्ता रेडियो नेपाल सुन्दै हुर्किएको सुनाए।

‘समाचार र कैयन शिक्षा, जनचेतना, मनोरञ्जनात्मकलगायत कार्यक्रम आफ्नो स्मृतिमा आज पनि मिठो सम्झना बनेर झंकृत भइरहेका छन्’, राष्ट्रपति पौडेलले उल्लेख गरे।

उनले लोकतन्त्र स्थापनासँगै मुलुकमा आमसंचारमाध्यमको विकास र विस्तारले गति लिएको उल्लेख टिप्पणी गरे।

राष्ट्रपति पौडेलको टिप्पणी थियो, ‘संविधानले व्यवस्था गरेको नागरिकको सूचनाको हक प्रत्याभूत गर्न रेडियो नेपालले नेपाली समाजको समावेशी चरित्रको संरक्षण र प्रवद्र्धनमा महत्वपूर्ण योगदान पुर्‍याएको छ।’

उनले सबै जातजाति, भाषाभाषीको अधिकार संरक्षण गर्ने बहुलवादमा आधारित लोकतन्त्रको सुदृढीकरणलाई आफ्नो धर्म मानेर काम गर्दा संस्थाले लिएका लक्ष्य पूरा हुने उल्लेख गरे।

संचारमाध्यम विपद्का बेला आमनागरिकको भरोसाको केन्द्र हुन्छ भन्ने प्रमाण २०७२ को भूकम्प, कोरोना महामारीलगायत विपद्का बेलामा रेडियो नेपालसहितका संचारमाध्यमले पुर्‍याएको योगदानबाट पुष्टि भएको छ’, उनले भने।

राष्ट्रपति पौडेलले २००७ सालको जनक्रान्ति र रेडियो नेपाल नेपालको इतिहासमा दुई जुम्ल्याहा घटना भएको उल्लेख गरे।

राष्ट्रपति पौडेलले स्मरण गरे, ‘२००७ सालको जनक्रान्तिको युगान्तकारी सन्देशलाई गाउँ गाउँ र जनजनमा पुर्‍याउन रेडियो नेपालले महत्वपूर्ण भूमिका निर्वाह गरेको थियो।

राष्ट्रपति पौडेलले रेडियो नेपालका संस्थापक तारिणीप्रसाद कोइरालाको योगदानको स्मरण गरे।

आजका दिन रेडियो नेपाल हुनुमा कोइरालाको लोकतान्त्रिक चेतना र मूल्यमान्यता मुख्य कारण भएको उनले सुनाए।

‘अहिले आएर रेडियो नेपाल स्वतन्त्र, स्वायत्त संस्थाका रूपमा सार्वजनिक प्रसारण माध्यमका रूपमा विकास भएको छ। त्यसैले, लोकतान्त्रिक मूल्यमान्यता, स्वतन्त्र व्यावसायिक पत्रकारिताको धर्म अनुरुप स्वच्छ, निष्पक्ष र जनताप्रति उत्तरदायी भएर नागरिकलाई सुसूचित गर्न सार्वजनिक सेवा प्रसारणका सम्बन्धमा विश्वले स्वीकारेका आधारभूत मान्यतालाई आत्मसात गर्ने मैले विश्वास लिएको छु’, राष्ट्रपति पौडलको कथन थियो।

स्वतन्त्रताका नाममा हिंशा सर्वदा निषेधित छ

राष्ट्रपति पौडेलले स्वतन्त्रताका नाममा हिंशा सर्वदा निषेध रहेको जनाए।

उनले भने, ‘नेपालको संविधानले नागरिकलाई आफ्नो विचार अभिव्यक्त गर्ने निर्बाध स्वतन्त्रता प्रदान गरेपनि स्वतन्त्रताका नाममा हिंसा, आगजनी, लुटपाट र तोडफोड गर्ने कार्य निषेधित छ। यस्ता प्रकृतिका घटना हुन नदिन सबै गंभीर बन्नुहुनेछ भन्ने मैले विश्वास लिएको छु।’

उनले लोकतन्त्रमा जनताको अभिमत सबैभन्दा ठूलो हुने बताए।

संविधानको व्यवस्था, मर्म र भावना कसैले भुल्न नहुने उनले स्पष्ट पारे।

राष्ट्रपति पौडेलले संविधानप्रदत्त अधिकार प्रयोग गर्दा त्यही संविधानले अपेक्षा गरेको लोकतान्त्रिक संस्कृति र संस्कार बसैले पनि बिर्सन नहुने धारणा राखे।

‘लामो संघर्ष, त्याग र बलिदानबाट जनता आफैले बनाएको संविधानले प्रत्येक नागरिकलाई आफ्नो असहमति राख्ने अधिकार प्रदान गरेको छ। संघीय लोकतान्त्रिक गणतन्त्रको यो सर्वाधिक सुन्दर पक्ष हो। तर, संविधानले प्रदान गरेको यो अधिकार प्रयोग गरिरहँदा हामी राज्य, कानुन र जनताप्रति जिम्मेवार पनि हुनु जरुरी छ’, राष्ट्रपति पौडेलले सुनाए।

समारोहमा राष्ट्रपति पौडेलले जनगायक रामकृष्ण दुवाल र देउडा गायक नन्दकृष्ण जोशीलाई ‘रेडियो नेपाल राष्ट्रिय स्रष्टा सम्मान–२०८१’ बाट सम्मान गरे।

साथै उनले वरिष्ठ संगीतकर्मीहरूलाई पनि सम्मान प्रदान गरे।