प्रधान सेनापति महिला फुटबलको फाइनलमा आर्मी–एपीएफको विभागीय डर्बी

पोखरा । विभागीय डर्बी नेपाली सेनाको त्रिभुवन आर्मी क्लब र सशस्त्र प्रहरी बलको एपीएफ काठमाण्डौंमा जारी सातौँ प्रधानसेनापति अन्तर्राष्ट्रिय महिला फुटबल प्रतियोगिताको फाइनलमा भिड्ने भएका छन् ।

जारी प्रतियोगिताको सोमबार भएको सेमिफाइनलमा एपीएफले नेपाल पुलिस क्लबलाई ५–२ फरक गोल अन्तरले हराउँदै फाइनलमा स्थान बनाएको हो । दोस्रो सेमिफाइनल खेलमा नेपाली सेनाको त्रिभुवन आर्मी क्लबले भुटानको राष्ट्रिय टोलीमाथि २–० को जित रच्दै एपीएफसँगको भेट पक्का गरेको हो ।

नेपाली सेनाको भद्रकालीस्थित मुख्यालयको खेल मैदानमा सोमबार भएको सेमिफाइनलमा एपीएफले शुरुवातदेखि नै पुलिस क्लबलाई दबाबमा राखेको थियो । एपीएफकी सावित्रा भण्डारीले ह्याट्रिक गरिन् ।

यस्तै, अनिता बस्नेत र रेखा पौडेलले समान १/१ गोल गरे । पुलिस क्लबका लागि घिमकुमारी गुरुङ र निशा सुनुवारले समान १/१ गोल गरे ।

एपीएफका लागि सावित्राले खेलको तेस्रो मिनेटमै गोल गर्दैै टोलीलाई अग्रता दिलाएकी थिइन् । यस्तै, पुलिसकी निशाले खेलको ४३ औँ मिनेटमा गोल गर्दै खेललाई १–१ गोलको बराबरीमा पु¥याइन् । मध्यान्तरअघिको इन्जूरी समयमा एपीएफकी अनिताले दोस्रो गोल गर्दै टोलीलाई २–१ को अग्रता दिलाइन् ।

लगत्तै पुलिसकी घिमकुमारीले गोल गर्दै एपीएफसँग २–२ को बराबरी गरिन् । मध्यान्तरपछिको खेल सकिँदासम्म एपीएफ र पुलिस २–२ गोलको बराबरीमा थिए । त्यसपछिको अतिरिक्त समयमा एपीएफका लागि सावित्राले २ र रेखाले १ गोल गरे ।

दोस्रो सेमिफाइनलमा आर्मीको जितमा पूजा राना र विमला चौधरीले समान १/१ गोलको योगदान गरे । खेलको १० औं मिनेटमा पूजाले गोल गर्दै आर्मीलाई अग्रता दिलाइन् । खेल सकिन ६ मिनेट बाँकी रहँदा विमला चौधरीले गोल गर्दै आर्मीको जित पक्का गरिन् ।