आयोजक भ्याली स्पोर्ट्स क्लबको सेतोलाई अमन स्मृति फुटबल उपाधि

पोखरा । आयोजक भ्याली स्पोर्ट्स क्लब सेतोले तेस्रो अमन गुरुङ स्मृति सेभेन ए साइड फुटबल प्रतियोगिताको उपाधि जितेको छ ।

पोखरा महानगरपालिका–१५, कोलपाटनको रेम्बो एकेडेमी होम्स्को खेल मैदानमा शनिबार भएको फाइनल खेलमा एलजी एशोसियसनलाई २–० गोलले पराजित गर्दै आयोजक सेतोले उपाधि जितेको हो ।

उपाधिसँगै उसले १ लाख ५० हजार, शिल्ड, मेडल तथा प्रमाणपत्र हात पारेको छ । उपविजेता एलजी एशोसिएसनले ७५ हजार सहित शिल्ड, मेडल तथा प्रमाणपत्रमा चित्त बुझाएको छ ।

बिजेता तथा उपबिजेता टिमलाई राष्ट्रिय खेलकुद परिषदका सदस्य राजेशकुमार गुरुङ, एन्फाका उपाध्यक्ष कृष्ण थापा, कास्की जिल्ला फुटबल संघ (एन्फा) अध्यक्ष मिलन गुरुङ, प्रयोजकलगायतले पुरस्कार वितरण गरेका थिए ।

भ्यालीको जितमा घनश्याम तामाङ र अजय श्रेष्ठ नायक बने । घनश्यामले खेल शुरु भएको ३ मिनेटमा गोल गर्दै आयोजकलाई अग्रता दिलाएका थिए । आयोजकको लागि दोस्रो गोल खेलको ३६ औ मिनेटमा अजय श्रेष्ठले गरेका थिए ।

यसअघि, शनिबार नै भएको सेमिफाइनलमा एलजीले सँगम एफसी र आयोजक भ्यालीले गार्डेन एफसीलाई हराउँदै फाइनलमा स्थान बनाएका थिए ।

आयोजक भ्याली स्पोर्टस् सेतोका अजय श्रेष्ठ प्रतियोगिताको सर्वोत्कृष्ट खेलाडी घोषित भए । अजयले १२ हजार रुपैयाँ प्राप्त गरे । सोही क्लबकै सुनिल गोदामे सर्वाधिक गोलकर्ता बने । सुनिलले ७ हजार रुपैयाँ प्राप्त गरे । उनले प्रतियोगिता अवधिभर ९ गोल गरेका थिए ।

प्रतियोगितालाई निरन्तरता दिनुस : राखेप सदस्य

सो अवसरमा बोल्दै प्रमुख अतिथि समेत रहेका राखेप सदस्य राजेश गुरुङले बिजयी टिमलाई बधाई दिए । गुरुङले भ्यालीले आगामी दिनमा समेत प्रतियोगितालाई निरन्तरता दिन आग्रह गरे । उनले आगामी दिनमा हुने प्रतियोगितालाई आफूले सक्दो सहयोग गर्ने प्रतिबद्धता जनाए । उनले पोखरा रंगशाला निर्माणपछि सेभेन ए साइडको समस्या समाधान हुने धारणा राखे ।

कास्की जिल्ला फुटबल संघ (एन्फा) अध्यक्ष मिलन गुरुङले सेभेन ए साइड फुटबललाई हेप्ने गरेको टिप्पणी गरे । संघभित्रको विकृतिले गर्दा फुटबल खेलको विकास नभएको उनको धारणा थियो । पहिले संघमा बल समेत नदिने प्रवृत्ति निकै मौलाएको अवस्थामा पछिल्लो समय खेल सामग्री संघले काठमाडौ लिन जान नपरेको उनले धारणा राखे ।

उक्त प्रतियोगितामा फुटबल खेलको विकासमा निरन्तर लागेका भन्दै सेभेन ए साइड महासंघका अध्यक्ष नविन पुनलाई सम्मान समेत गरिएको आयोजकले जनाएको छ ।