यु–१८ सर्किट–२ टेनिसमा नेपालकी प्रेरणा र अभिलाषा सेमिफाइनलमा

पोखरा । आइटीएफ यु–१८ सर्किट–२ टेनिस प्रतियोगिता पोखरामा जारी छ । पोखरा रंगशालास्थित टेनिस कोर्टहरुमा  भएको महिलातर्फको एकल खेलमा नेपाली खेलाडीहरुले राम्रो नतिजा निकालेका छन् ।

महिलातर्फका एकल खेलमा नेपालकी प्रेरणा कोइराला र अभिलाषा बिष्टले राम्रो प्रदर्शन गर्दै प्रतियोगिताको सेमिफाइनलमा प्रवेश गरेका छन् । पहिलो खेलमा नेपालकी प्रेरणा कोइरालाले नेपालकै सलोनी तामाङमाथि ७–६ (५) र ६–३ को जित निकाल्दै सेमिफाइनलमा स्थान बनाएकी छन् ।

त्यस्तै, दोस्रो खेलमा नेपालकी अभिलाषा बिष्टले जापानकी आओका नागासावाको चुनौतिलाई ६–१ र ६–४ ले पन्छाउँदै सेमिफाइनलका लागि स्थान पक्का गरिन् । महिलातर्फकै एकलमा भारतकी गार्गी पावरले चीतकी शुआङ लिआङमाथि ६–२ र ६–२ कै जित निकाल्दै सेमिफाइनल प्रवेश गरिन् ।

महिलातर्फको अन्तिम क्वाटरफाइनल खेलमा सिंगापुरकी देआन्ने चूले चीनकी हुआई झाङमाथि ७–५ र ६–२ को सहज जित निकाल्दै सेमिफाइनल पुगिन् । सेमिफाइनलमा प्रेरणा कोइरालाले भारतकी गार्गी पावरसँग र अभिलाषा बिष्टले सिंगापुरकी देआन्ने चूसँग फाइनलका लागि प्रतिस्पर्धा गर्नेछन् ।

त्यस्तै, पुरुषतर्फको प्रतिस्पर्धामा भारतीय खेलाडी जैस्भीन सिधानाले भारतकै टोरस रावतलाई ६–२, ६–१ को सेटमा पन्छाए । अर्को खेलमा भारतीय खेलाडी कृष्ण हुदाले जापानका सातोरु नाकाजिमालाई ६–२ र ६–३ ले पराजित गरे ।

पुरुषतर्फकै अर्को एकल खेलमा जापानका शोगो सनाडाले भारतीय खेलाडी आर्यन लक्ष्मणलाई ६–७ (४), ६–० र ६–४ को सेटले पराजित गरे । पुरुषकै एकलतर्फको प्रतिस्पर्धामा भारतीय खेलाडी अमन दहियाले जर्मनीका पउल अर्मिन अलब्रेच्टमाथि ६–३, र ६–३ कै सोझो सेटमा जित निकाले ।

महिलाको डबल्सतर्फ भारतकी गार्गी परवर र हृदय शाको जोडीले मलेसियाकी हुई ईल सू र नेपाली खेलाडी सलोनी तामाङको जोडीलाई ६–४ र ६–३ को सेटले पन्छाउँदै फाइनल प्रवेश गरेका छन् ।

अर्को खेलमा हङकङकी ईरिका कन्ना हगी र भारतकी रिया उबोभेजाको जोडीले नेपालकी अभिलाषा विष्ट र ईरा मेहरनिस्सा रावतको जोडीलाई ६–३, ६–२ को सेटले पन्छाउँदै फाइनल पुगेका छन् ।

पुरुषतर्फको डबल्स प्रतिस्पर्धामा दुवै भारतीय टिम फाइनल प्रवेश गरेको छ । भारतीय खेलाडीहरु आदित्य वरदान राय चौधरी र जैश्भीन सिधानाको जोडी तथा भारतकै अमन दहिया र हीरक भोराको जोडीले फाइनलमा आमने–सामने हुने भएका छन् ।

डबल्सतर्फको पहिलो सेमिफाइनल खेलमा भारतका आदित्य वरदान राय चौधरी र जैश्भीन सिदानाको जोडीले जापानका सातोरु नाकाजिमा र शोगो सनादाको जोडीलाई टाइब्रेकमा ३–६, ६–१ र १०–८ ले पराजित गर्दै फाइनल प्रवेश गरेका छन् ।

त्यस्तै, दोस्रो खेलमा भारतकै अमन आदित्य र हीरक भोराको जोडीले जापानकाम योशिनोबु नाकात्सुजी र ताकुमी वातानाबेको जोडीमाथि टाइब्रेकमै ४–६, ६–२ र ११–९ को सेटमा हराउँदै फाइनलमा स्थान बनाएका छन् ।