विभागीय आर्मी दिवाकर भुसाल स्मृति राष्ट्रिय क्लब भलिबल च्याम्पियन

चितवन । विभागीय सेनाको त्रिभुवन आर्मी क्लबले दिवाकर भुसाल स्मृति राष्ट्रिय क्लब भलिबल च्याम्पियन बनेको छ ।

चितवनको माडीमा भएको फाइनलमा अर्को विभागीय सशस्त्र प्रहरी बलको एपीएफ क्लबलाई ३–० को सोझो सेटमा पराजित गर्दै आर्मी च्याम्पियन बनेको हो ।

आर्मीले एपीएफमाथि २५–१५, २५–२० र २५–२२ को सेटमा जित निकाल्यो । आर्मीले एपीएफसँग पाँचौ आरबीबी एनभीए क्लब च्याम्पियसीपमा भोगेको थियो । उपाधिसँगै विजेता आर्मीले २ लाख र उपविजेता एपीएफले १ लाख पुरस्कार पाएको छ । प्रतियोगितामा अर्को विभागीय नेपाल पुलिस क्लब तेस्रो बन्यो । गण्डकी प्रदेशलाई हराउँदै तेस्रो बनेको पुलिसले ५० हजार र गण्डकीले २५ हजारमा चित्त बुझायो ।

प्रतियोगितामा आर्मीका धनबहादुर भट्ट सर्वोकृष्ट खेलाडी बन्दै १० हजार पुरस्कार हात पारे । एपीएफका विजय थापा उत्कृष्ट स्पाइकर, एपीएफकै लोकेन्द्र गिरी उत्कृष्ट सेटर, पुलिसका ईम राना उत्कृष्ट सर्भर, आर्मीका ईश्वर थापामगर उत्कृष्ट लिबेरो र आर्मीका ज्ञानेश्वर अधिकारी उत्कृष्ट प्रशिक्षक चुनिए । उनीहरुले जनही ५/५ हजार पुरस्कार पाए । नगर खेलकुद विकास समिति माडीले आयोजना गरेको प्रतियोगितामा ६ टोलीको सहभागिता थियो ।