फिफा यु–२० विश्वकपमा ट्रिपल ह्याट्रिकसहित ब्राउट हल्याण्डले बनाए आफ्नो नाममा नयाँ रेकर्ड

पोखरा । नर्वेका १८ वर्षीय युवा फरवार्ड इर्लिङ ब्राउट हल्याण्डले एउटै खेलमा ९ गोल गरेर विश्व कीर्तिमान बनाएका छन् ।

पोल्यान्डमा जारी फिफा यु–२० विश्वकप फुटबल प्रतियोगितामा हल्याण्ड एक्लैले नौ गोल हानेर फुटबल जगतमा सनसनी मच्चाएका हुन् ।
हल्याण्डको ९ गोलको मदतमा नर्वेले यु–२० को इतिहासमा सबैभन्दा फराकिलो जित निकाल्दा हल्याण्डले पनि रेकर्ड बनाए । यु–२० मा एकै खेलमा सबैभन्दा बढी गोल गर्ने खेलाडीको रेकर्ड अब हल्याण्डको नाममा रहेको छ ।

बुधबार राति समूह चरणअन्तरगत तेस्रो खेलमा नर्वेले होन्डुरसलाई १२–० को फराकिलो अन्तरले हराएको थियो । जसमा हल्याण्ड एक्लैले ९ गोल हानेर ट्रिपल ह्याट्रिक’ पूरा गरे । खेलको सातौं मिनेटबाट गोल गर्न शुरु गरेका हल्याण्डले ९० औं मिनेटमा ट्रिपल ह्याट्रिक पूरा गरेका थिए ।

३६ औं मिनेटमा हल्याण्डले पहिलो ह्याट्रिक पूरा गरेका थिए । ६७ औं मिनेटमा डबल ह्याट्रिक पूरा गरे । त्यस्तै, ९० औं मिनेटमा उनले ट्रिपल ह्याट्रिक पूरा गरे । नर्वेले १२ गोल गरेको उक्त खेलमा होन्डुरसले एक गोलपनि फर्काउन सकेन ।

हल्याण्डले पहिलो हाफमा चार गोल गर्न सफल भए । उनले दोस्रो हाफमा पाँच गोल थपे । हल्याण्डले एक गोल भने पेनाल्टीमार्फत गरेका थिए । हल्याण्डले खेल शुरू भएको सातौं मिनेटमा नै गोल गर्दै आफ्नो टोलीलाई अग्रता दिलाएका थिए । उनले २० औं मिनेटमा दोस्रो गोल गर्दै आफ्नो टिमको अग्रतालाई दोब्वर बनाए ।

उनले ३६ औं मिनेटमा पेनाल्टी गोल गर्दै ह्याट्रिक पहिलो ह्याट्रिक पूरा गरेका थिए । त्यपछि खेलेको ४३ औं मिनेटमा गोल गर्दै उनले पहिलो हाफमै व्यक्तिगत ४ गोल गरे ।

दोस्रो हाफ शुरू भएको पाँच मिनेटपछि नै उनले फेरी गोलको बर्षा गराए । उनले ५० औं मिनेटमा पाँचौं, ६७ औं मिनेटमा छैटौं गोल गर्दै डबल ह्याट्रिक पूरा गरे । त्यसपछि खेलको ७७ औं मिनेटमा साँतौं गोल, ८८ औं मिनेटमा आठौं र ९० औं मिनेटमा नवौं गोल गर्दै एउटै खेलमा ट्रिपल ह्याट्रिक पूरा गरे ।